काठमाडौं — गल्फ क्षेत्रमा हवाई क्षेत्र अवरुद्ध भएपछि दुबई र अबुधाबीलाई 'हब' बनाएर सञ्चालन हुने दुई प्रमुख वायुसेवा कम्पनी एमिरेट्स र इतिहाद एयरवेजले आफ्ना नियमित उडान स्थगनको अवधि थपेका छन् । यूएईस्थित एमिरेट्सले दुबई आउने-जाने सबै नियमित उडान स्थानीय समयअनुसार बुधबार राति ११:५९ बजेसम्मका लागि स्थगित गरेको जनाएको छ ।

कम्पनीले बुधबार पनि सीमित संख्यामा यात्रु उद्धार (रिपाट्रिएसन) तथा कार्गो उडान सञ्चालन गर्ने स्पष्ट पारेको छ । ती उडानमा पहिल्यै टिकट बुक गरेका यात्रुलाई प्राथमिकताका आधारमा समायोजन गरिने जनाइएको छ ।

एमिरेट्सले यात्रुलाई सिधै सूचना प्राप्त नभएसम्म वा विशेष उडानका लागि पुष्टि गरिएको टिकट नभएसम्म विमानस्थलमा नजान आग्रह गरेको छ । उडानसम्बन्धी अद्यावधिक विवरण आधिकारिक वेबसाइटमार्फत सार्वजनिक गरिने र यात्रुलाई यात्राअघि उडानको अवस्था जाँच गर्न, इमेलमार्फत प्राप्त सूचना हेर्न अनुरोध गरिएको छ । कम्पनीले यात्रु तथा चालक दलको सुरक्षा उच्च प्राथमिकता भएको दोहोर्‍याएको छ ।

सन् १९८५ मा स्थापना भएको एमिरेट्स दुबई अन्तर्राष्ट्रिय विमानस्थललाई 'हब' बनाएर सञ्चालन हुने विश्वका अग्रणी अन्तर्राष्ट्रिय एयरलाइन्समध्येको हो । यसले ६ महादेशमा फैलिएको सञ्जालमार्फत सेवा दिँदै आएको छ । एमिरेट्सको नेपालमा प्रत्यक्ष उडान छैन । यद्यपि, फ्लाई दुबईमार्फत दुबई पुगेका धेरै नेपाली यात्रुले युरोप, अमेरिका र क्यानडातर्फ जान एमिरेट्स वा एतिहादका उडान प्रयोग गरेका छन् ।

यसैबीच, यूएईको राष्ट्रिय ध्वजावाहक एतिहाद एयरवेजले पनि अबुधाबी आउने-जाने सबै नियमित व्यावसायिक उडान यूएई समयअनुसार बिहीबार दिउँसो २ बजेसम्मका लागि स्थगित गरेको जनाएको छ । कम्पनीका अनुसार सम्बन्धित सरकारी निकायसँग समन्वय गरी केही विमान पुनःस्थापन (रिपोजिसनिङ), कार्गो तथा यात्रु उद्धार उडान सञ्चालन हुन सक्नेछन् तर ती उडान कडा सुरक्षा र प्राविधिक स्वीकृतिपछि मात्र सञ्चालन गरिने उल्लेख छ ।