बोर्डले मंगलबार सूचना जारी गर्दै डाउनलिंक अनुमति लिएर नेपालमा प्रसारण भइरहेका कतिपय विदेशी च्यानलहरूले कानुन विपरीत विज्ञापनसहित प्रसारण गरिरहेको पाइएकाले त्यस्ता च्यानलहरूलाई पत्राचार समेत गरिसकिएको जनाएको छ ।
What you should know
काठमाडौँ — नेपालमा क्लिन फिड (विज्ञापनरहित) प्रसारणको व्यवस्था कार्यान्वयन गर्न नियामक नेपाल विज्ञापन बोर्डले विदेशी टेलिभिजन च्यानलहरूलाई निर्देशन दिएको छ । बोर्डले मंगलबार सूचना जारी गर्दै डाउनलिंक अनुमति लिएर नेपालमा प्रसारण भइरहेका कतिपय विदेशी च्यानलहरूले कानुन विपरीत विज्ञापनसहित प्रसारण गरिरहेको पाइएकाले त्यस्ता च्यानलहरूलाई पत्राचार समेत गरिसकिएको जनाएको छ ।
नेपालमा विज्ञापन नियमन गर्ने र स्वदेशी विज्ञापन बजारको संरक्षण गर्ने उद्देश्यले सरकारले २०७७ साल कात्तिकदेखि क्लिनफिड प्रसारण प्रणाली लागू गरेको थियो । विदेशी टेलिभिजन च्यानलहरू नेपालमा प्रसारण हुँदा त्यसमा समावेश भएका विदेशी विज्ञापन हटाएर विज्ञापनरहित कन्टेन्ट प्रसारण गर्नु क्लिनफिड हो । पछिल्लो समय विशेषगरी कतिपय विदेशी खेलकुद च्यानलहरूले यो व्यवस्थाको उल्लंघन गर्दै विज्ञापन देखाइरहेको पाइन्छ ।
‘नेपालमा डाउनलिंक अनुमति लिई प्रसारण भएका कतिपय विदेशी च्यानलहरूले विज्ञापनसहित प्रसारण गरिरहेको र त्यस्ता च्यानलविरुद्ध बोर्डमा उजुरी प्राप्त भई सम्बन्धितलाई पत्राचार समेत गरिएको छ,’ बोर्डको सूचनामा भनिएको छ ।
विज्ञापन (नियमन गर्ने) ऐन, २०७६ को दफा ६ को उपदफा (१) मा नेपालमा प्रसारण हुने विदेशी टेलिभिजन च्यानलहरूले विज्ञापनरहित प्रसारण गर्नुपर्ने अनिवार्य व्यवस्था गरिएको छ । साथै, केही नेपाल ऐन संशोधन गर्ने ऐन, २०८२ मार्फत विज्ञापन (नियमन गर्ने) ऐनमा संशोधन गरी विदेशी च्यानलहरूबाट विज्ञापनरहित प्रसारण भए वा नभएको अनुगमन गर्ने र कारबाही गर्ने पूर्ण अधिकार बोर्डलाई प्रदान गरिएको छ । ऐनको दफा ६ बमोजिमको कसुर गर्ने वा गराउने व्यक्ति वा संस्थालाई ऐनको दफा २५(३)(ख) बमोजिम ५ लाख रुपैयाँसम्म जरिवाना हुने कानुनी प्रावधान छ ।
विज्ञापन बोर्डले सबै वितरक, मल्टी सिस्टम अपरेटर, लोकल केबल अपरेटर तथा अन्य सरोकारवालाहरूलाई अनिवार्य रूपमा विज्ञापनरहित प्रसारण गराउन निर्देशन दिएको छ । डाउनलिंक अनुमति प्राप्त च्यानलहरूले विज्ञापनसहित प्रसारण गरेको पाइएमा प्रचलित कानुन बमोजिम जरिवाना र अन्य कारबाही गरिने बोर्डका प्रमुख प्रशासकीय अधिकृत देवी पाण्डे (खत्री) ले हस्ताक्षर गरेको सूचनामा उल्लेख छ ।
