काठमाडौँ — भारतको एआई–केन्द्रित विकास रणनीतिका लागि दीर्घकालीन ऊर्जा आपूर्ति सुनिश्चित गर्न नेपाल महत्त्वपूर्ण साझेदार बन्न सक्ने धारणा अघि सारिएको छ । नयाँ दिल्लीमा सम्पन्न ‘इन्डो-नेपाल ट्रेड फेस्टिभल २०२६’ मा सहभागी नीति-निर्माता, कूटनीतिक र निजी क्षेत्रका प्रतिनिधिहरूले नेपालको स्वच्छ जलविद्युत् स्रोत र भौगोलिक विशेषताले भारतमा विस्तार भइरहेको डिजिटल तथा एआई पूर्वाधारलाई भरपर्दो ऊर्जा आधार प्रदान गर्न सक्ने बताएका हुन् ।

तीन दिनसम्म चलेको महोत्सवले नेपाल-भारतबीच बहुआयामिक आर्थिक, प्राविधिक र सांस्कृतिक सहकार्यलाई नयाँ उचाइमा पुर्‍याउने लक्ष्य राखेको थियो । एभरेस्ट च्याम्बर अफ कमर्सले आयोजना गरेको कार्यक्रममा नेपाल पर्यटन बोर्ड र व्यापार तथा निकासी प्रवर्द्धन केन्द्रले सहकार्य गरेका थिए । आयोजकका अनुसार ५० भन्दा बढी स्टल र करिब २० हजार दर्शकको सहभागिताले द्विपक्षीय व्यापार र लगानी सहकार्यप्रति बढ्दो चासो झल्काएको थियो ।

ऊर्जासम्बन्धी सत्रमा वक्ताहरूले ‘हिमालयन कम्प्युट करिडोर’ अवधारणा अघि सार्दै नेपालमा उपलब्ध स्वच्छ जलविद्युत्, चिसो हावापानीजस्ता स्रोतले डेटा सेन्टर तथा एआई इकोसिस्टम विकासका लागि उपयुक्त वातावरण प्रदान गर्न सक्ने बताएका थिए । भारतले एआई, क्लाउड कम्प्युटिङ र उच्च क्षमताका डेटा प्रोसेसिङमा लगानी विस्तार गरिरहेको छ । यसै सन्दर्भमा दीर्घकालीन, हरित र स्थिर ऊर्जा आपूर्ति महत्त्वपूर्ण आवश्यकता भएको उनीहरूको भनाइ थियो ।