नेपालमा राफ्टिङ  सन् १९६० को दशकबाट सुरु भएको मानिन्छ । सन् १९६४ मा फ्रान्सेली टोलीले त्रिशूली र १९६५ मा सर एडमण्ड हिलारीको टोलीले सुनकोशीमा गरेको जलयात्रा महत्त्वपूर्ण कोशेढुंगा बनेका थिए । सन् १९७५ मा हिमालयन रिभर एक्सप्लोरेसनमार्फत व्यावसायिक राफ्टिङ औपचारिक रूपमा सुरु भएको हो । नारा २०४६ सालमा स्थापना भएको हो ।

महोत्सव पर्यटन बोर्डको सहकार्यमा हुने भनिएको छ । पत्रकार सम्मेलनमा बोल्दै नेपाल पर्यटन बोर्डका वरिष्ठ निर्देशक हिक्मतसिंह ऐरले लामो समयदेखि ह्वाइटवाटर शृंखलामा पर्यटन बोर्डले सहकार्य गर्दै आइरहेको उल्लेख गर्दै यसपटक नदीमा आधारित साहसिक खेललाई नेपालको सशक्त पर्यटन पहिचानका रूपमा स्थापित गर्ने लक्ष्य लिइएको बताए । ‘सगरमाथा र हिमालसँगै राफ्टिङ, कायाकिङ र कनोइङजस्ता नदीजन्य साहसिक गतिविधिलाई अन्तर्राष्ट्रिय बजारमा प्रवर्द्धन गर्न आवश्यक छ,’ उनले भने, ‘यसका लागि नदी संरक्षणमा पनि समानान्तर रूपमा जोड दिनुपर्छ ।’