पर्सा — खाद्य व्यवस्था तथा व्यापार कम्पनी लिमिटेड वीरगन्ज शाखा यस वर्षको धान खरिदको लक्ष्य नजिक पुगेको छ ।

शाखाले सोमबारसम्ममा ९ हजार २ सय १७ क्विन्टल २० किलो धान खरिद गरेको छ । शाखा प्रमुख पंकजकुमार झाले यस वर्ष १० हजार क्विन्टल धान खरिदको कोटा पाएकामा लक्ष्यको नजिक पुगेको बताए ।

शाखाले यस वर्ष पुस ६ देखि धान खरिद सुरु गरेको हो । धान खरिदका लागि यस वर्ष २ सय ७५ किसानलाई टोकन वितरण गरिएकामा तीमध्ये केही किसान नआएकाले प्रतिक्षा सूचीमा राखिएका किसानबाट हाल धान खरिद भइरहेको उनले बताए । अब कम्तीमा एक साता र बढीमा माघ महिनाभित्र धान खरिदको लक्ष्य भेट्टाउने अनुमान झाको छ ।