काठमाडौँ — सीडीएस एन्ड क्लियरिङ लिमिटेडले 'मेरो सेयर' एपबाट सूर्यकुण्ड हाइड्रो इलेक्ट्रिक लिमिटेडको सर्वसाधारणहरुको लागि जारी गरिएको प्राथमिक सेयर निष्कासन (आईपीओ) हटाइएको छ ।  यसअघि आजदेखि  सर्वसाधरणलाई आईपीओ जारी गर्ने सूचना राखिएकोमा एक्कासी हटाइएको हो ।

अहिले मेरो सेयर एपमा सूर्यकुण्ड हाइड्रो इलेक्ट्रिकको सूचना देखिदैन । सीडीएससीद्वारा जारी सूचनामा उक्त कम्पनीको सूची हटाइएको जनाएको छ । 

निष्काशन तथा बिक्री प्रबन्धक रहेको कुमारी क्यापिटलले सि-आस्बा प्रणालीमा प्रति कित्ता सेयर १०० रुपैयाँ हुनु पर्नेमा प्रति कित्ता सेयर १०  रुपैयाँ राखेकाले हटाइएको सूचनामा उल्लेख छ ।

'कुमारी क्यापिटल लिमिटेडको निष्काशन तथा बिक्री प्रबन्धकमा सूर्यकुण्ड हाइड्रो इलेक्ट्रिक लिमिटेडको सर्वसाधारणहरुको लागि जारी गरिएको अंकित मुल्य रु १००।- को ५ लाख ७२ हजार ४ सय ३१ कित्ता साधारण सेयर मिती २०८२/१०/१८ गते देखि निष्काशन गरिएकोमा सि-आस्बा प्रणालीमा प्रति कित्ता सेयर १०० रुपैयाँ हुनु पर्नेमा यस क्यापिटलले भुलबस प्रति कित्ता सेयर १० रुपैयाँ भई निष्काशन खुल्ला भएकोमा सफ्टवेयरमा त्रुटि सच्याउनका लागि केहि समयका लागि आवेदन दिन बन्द गरिएको व्यहोरा सम्बन्धीत सबैमा जानकारीको लागि अनुरोध छ,' सूचनामा भनिएको छ ।