काठमाडौँ — अघिल्लो दिन ५७ अंकले बढेको नेप्से सोमबार ३.०७ अंकले घट्यो । नेप्से घटे पनि सोमबार कारोबार रकममा भने बढोत्तरी आएको छ । सो दिन १६ अर्ब ३५ करोड ५७ लाख रुपैयाँको सेयर कारोबार भएको छ ।

सोमबारको कारोबार पछिल्लो सात महिनायताकै उच्च हो । यसअघि १५ साउन २०८२ मा सेयर बजारमा १६ अर्ब ४४ करोड रुपैयाँको कारोबार भएको थियो । 

विश्लेषकहरूले लामो समयसम्म उच्च अंकले बढ्न नसकेको नेप्से आइतबार ५७ अंकले बढेकाले सोमबार ‘करेक्सन’ भएको तर्क राखेका छन् । नेप्से घटे पनि कारोबार रकम उल्लेख्य रूपमा बढ्नुले सोमबार नेप्सेमा ‘करेक्सन’ भएको पुष्टि हुने उनीहरूको भनाइ छ । सेयर बजारमा केही समय लगातार वृद्धि/गिरावट भएपछि लगत्तै बजारले तय गर्ने विपरीत दिशालाई प्राविधिक रूपमा ‘करेक्सन’ भनिन्छ । 

सोमबार सेयर बजारमा १ लाख ४७ हजार ६ सय ७६ पटक कारोबार हुँदा ३ करोड ६२ लाख ६४ हजार ८ सय ७३ कित्ता सेयर किनबेच भएको छ । नेप्सेका अनुसार अघिल्लो दिनको तुलनामा कारोबार रकम, कारोबार सेयर संख्या र कारोबार पटक पनि बढेको हो । 

यससँगै सेयर कारोबार मापक नेप्से परिसूचक सोमबार ३.०७ अंकले घटेको छ । आइतबारको तुलनामा शून्य दशमलव ११ प्रतिशतले नेप्से घटेपछि २७ सय ६९ दशमलव ०९ बिन्दुमा ओर्लिएको छ । सो दिन कारोबारमा आएकामध्ये ८८ कम्पनीको सेयर मूल्य बढ्यो, १६५ कम्पनीको मूल्य घट्यो भने ७ कम्पनीको मूल्य स्थिर रह्यो ।

कारोबारमा आएका १३ उपसमूहमध्ये होटल तथा पर्यटन, जलविद्युत्, उत्पादन तथा प्रशोधन र सामूहिक लगानी कोष मात्रै बढ्यो । बाँकी उपसमूहरू घट्यो । होटल तथा पर्यटन १२७.६८, जलविद्युत् ११.०४, उत्पादन तथा प्रशोधन ३८.९४ र सामूहिक लगानी कोष ०.१६ प्रतिशतले बढेको छ । घट्नेमा जीवन बिमा ७१.८६, लघुवित्त २५.५४, निर्जीवन बिमा १९.३३ अंकले घटेको नेप्सेको तथ्यांक छ । 

सोमबार एसवाई प्यानल नेपाल, हिम स्टार ऊर्जा कम्पनी, सान्भी इनर्जी, सप्तकोशी विकास बैंक र माउन्टेन हाइड्रो नेपालको सेयर मूल्य १० प्रतिशतले बढेपछि सर्किट ब्रेक लाग्यो । यी कम्पनीका लगानीकर्ताहरूको सम्पत्तिको मूल्य बढेको छ । तर, नेसनल हाइड्रो पावर कम्पनीको ३.१२, कालिका पावर कम्पनीको २.९६, ज्योति विकास बैंकको २.९५, सानिमा ग्रोथ फन्डको २.८० र गुहेश्वरी मर्चेन्ट बैंक एन्ड फाइनान्सको २.७८ प्रतिशतले सेयर मूल्य घटेपछि लगानीकर्ताको सम्पत्तिको मूल्य घटेको छ ।