विराटनगर — आत्मनिर्भर अर्थतन्त्र निर्माण गर्ने निजी क्षेत्र कुनै प्रकारको आक्रमणको निसाना हुन नहुने उद्योगी व्यवसायीले बताएका छन् । यस्ता गतिविधि नियन्त्रण गरी निजी क्षेत्रले भोग्दै आएको पीडालाई कम गर्न राजनीतिक दल र नागरिकले दृढ प्रतिबद्धता जनाउनुपर्नेमा उनीहरूको जोड छ ।

उद्योग संगठन मोरङ र राष्ट्रिय व्यावसायिक पहलको आयोजना तथा नेपाल उद्योग वाणिज्य महासंघ कोशी प्रदेशको समन्वयमा ‘निजी क्षेत्र प्रश्न, पहिचान र प्रतिबद्धता’ विषयक बृहत् अन्तर्क्रियात्मक कार्यक्रममा उद्योग संगठन मोरङका अध्यक्ष नन्दकिशोर राठीले हरेक आन्दोलनमा निजी क्षेत्रका उद्योग, व्यापारिक केन्द्र, पसल, गोदाम र घर नियोजित रूपमा तोडफोड र आगजनीको सिकार बन्ने गरेकाले उद्योगीहरू आफ्नै देशमा लगानी गर्न डराउनुपर्ने अवस्थामा पुगेको बताए ।

‘सामाजिक सञ्जालमार्फत निजी क्षेत्रविरुद्ध फैलाइने मिथ्या, भ्रामक र उत्तेजक सूचनाले लगानी गर्नु पाप हो कि, नाफा कमाउनु अपराध हो कि भन्ने भाष्य निर्माण हुँदै गएको छ,’ उनले भने ।

निजी क्षेत्रले दिगो, स्थिर र पूर्वानुमान गर्न सकिने नीतिको अपेक्षा गरे तापनि मुलुकमा सरकार परिवर्तनसँगै नीति परिवर्तन हुने प्रवृत्ति, अनियमितता, सुशासनको अभाव, ढिलासुस्ती र भ्रष्टाचार जस्ता समस्याले निजी क्षेत्रलाई बारम्बार अवरोध पारिरहेको अध्यक्ष राठीको भनाइ छ । उद्योग व्यवसाय सञ्चालन गर्दा आइपर्ने यस्ता बाधा अड्चन फुकाउन निजी क्षेत्रले बाध्यतावश राजनीतिक शक्ति केन्द्रहरूको सामीप्य खोज्नुपर्ने अवस्था सिर्जना भएको उनले बताए । ‘यस्तो अवस्था आउनु न निजी क्षेत्रका लागि स्वस्थ हो, न त लोकतान्त्रिक राज्य व्यवस्थाका लागि नै उचित हो,’ उनले भने । 

आर्थिक विकासको मेरुदण्डका रूपमा रहेको निजी क्षेत्र आजका दिनमा गहिरो पीडा, त्रास र अनिश्चितताको भुमरीमा फसेको राष्ट्रिय व्यावसायिक पहलका अध्यक्ष कुशकुमार जोशीले उल्लेख गरे । राज्यको कानुन र नीतिको पालना गरी कर तिरेर आर्थिक विकासमा योगदान दिँदा पनि समाजको दृष्टिकोण यस क्षेत्रप्रति अझै सकारात्मक बन्न नसकेको उनको भनाइ छ । निजी क्षेत्रविरुद्ध फैलिँदै गएको नकारात्मक भाष्यले उद्योग व्यवसायमैत्री वातावरण दिन प्रतिदिन कमजोर बनाउँदै लगेको उनले जनाए । 

उद्योगी व्यवसायीको मनोबल र आत्मविश्वास खस्किँदै गएकाले नयाँ लगानी गर्ने वातावरण धूमिल बन्दै गएकाले यस्तो अवस्थामा निजी क्षेत्रको वास्तविक चुनौतीलाई तथ्य र तर्कका आधारमा राष्ट्रिय तहमा स्पष्ट र बुलन्द रूपमा प्रस्तुत गर्नु सबैको दायित्व भएको उनको भनाइ छ । 

उद्योग र व्यापार कुनै वर्ग, व्यक्ति वा समूहको नभई राष्ट्रिय अर्थतन्त्रको मेरुदण्ड भएको राष्ट्रिय व्यावसायिक पहलका केन्द्रीय संयोजक किशोर प्रधानले बताए । लाखौं नेपालीलाई रोजगारी दिने, राज्यलाई कर र राजस्वमार्फत आर्थिक सशक्तता प्रदान गर्ने, पुँजी निर्माण र लगानीमार्फत विकासको ढोका खोल्ने क्षेत्र यही भएकाले यस क्षेत्रको अमूल्य योगदानलाई सबैले अन्तरात्माबाट समीक्षा गर्नुपर्ने उनको धारणा छ ।