काठमाडौँ — साप्ताहिक कारोबारको अन्तिम दिन बिहीबार सेयर कारोबार नेप्से परिसूचक ९.२३ अंकले बढेको छ । अघिल्ला चार कारोबार दिन लगातार बढेको नेप्से बुधबार करिब साढे ९ अंकले घटेको थियो ।

तर, बिहीबार भने नेप्से पुरानै लयमा फर्किंदै करिब सवा ९ अंकले बढेको हो । बुधबारको तुलनामा ०.३४ प्रतिशतले बढेर बिहीबार नेप्से २ हजार ७ सय १४.६१ अंकमा उक्लेर बन्द भएको छ ।

एक दिन सार्वजनिक बिदाका कारण यो साता चार दिन मात्र सेयर बजार खुल्यो । जसमा तीन दिन नेप्से बढ्यो, दुई दिन घट्यो । तीन दिनमा नेप्से ८२.६१ अंकले बढ्यो भने एक दिन ९.४३ अंकले घट्यो । यसरी समग्र सातामा नेप्से ७३.१८ अंकले बढेको देखिन्छ । 

२१ फागुनमा हुने प्रतिनिधिसभा निर्वाचनका लागि प्रत्यक्षतर्फ गत मंगलबार देशभर उम्मेदवारी दर्ता गरेका छन् । यो उत्साहले तोकिएको समयमै निर्वाचन हुने निश्चितप्रायः छ । निर्वाचन प्रक्रिया अघि बढेसँगै मुलुकमा निर्वाचन हुने निश्चित भएपछि लगानीकर्तामा उत्साह देखिएको ब्रोकर बताउँछन् । निर्वाचन सकिएपछि नयाँ सरकार आउने र राजनीतिक स्थिरता हुने आसमा लगानीकर्ताले सेयरमा लगानी बढाएको उनीहरूको भनाइ छ । 

नेपालको सेयर बजारमा हरेक निर्वाचनको समयमा सेयर बजारमा सकारात्मक प्रतिक्रिया देखिँदै आएको छ । सोही क्रममा आसन्न निर्वाचनको सकारात्मक प्रभाव पनि सेयर बजारमा देखिन थालेको जानकारबताउँछन् । बिहीबार पनि त्यसकै निरन्तरता भएको उनीहरूको भनाइ छ । 

बिहीबार कारोबारमा आएकामध्ये १६२ कम्पनीको सेयर मूल्य बढ्यो, ८८ कम्पनीको मूल्य घट्यो । र, बाँकी १० कम्पनीको स्थिर रह्यो । सो दिन १६२ कम्पनीका लगानीकर्ताले नाफा कमाएका छन् । ती कम्पनीको सेयर मूल्य बढेपछि सेयरधनीको सम्पत्तिको मूल्य बढेको हो ।

एसवाई प्यानल, श्रीनगर एग्रिटेक र त्रिशूली जलविद्युत् कम्पनीको सेयर मूल्य १०/१० प्रतिशत बढेपछि कारोबार नियन्त्रणका लागि नेप्सेले सर्किट ब्रेकर लगाएको थियो । तर बिहीबार ८८ कम्पनीका सेयरधनीले भने नोक्सानी बेहोरेका छन् । यीमध्ये कालिका पावर कम्पनीको सेयर मूल्य सबैभन्दा धेरै ६.२५ प्रतिशतले घटेको छ । योसहित ८८ वटा कम्पनीको सेयर मूल्य घटेपछि सेयरधनीको सम्पत्तिको मूल्य घटेको हो । 

बिहीबार कुल ९४ हजार १ सय ७४ पटकको सेयर किनबेचमा १ करोड ९० लाख ७५ हजार ७ सय ५६ कित्ता सेयर किनबेच भए । ती किनबेचमा ९ अर्ब ७ करोड ३९ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम बढेको हो । बुधबार ८ अर्ब ९२ करोड ३६ लाख रुपैयाँको सेयर कारोबार भएको थियो ।

सो दिन कारोबारमा आएका १३ उपसमूहमध्ये बैंकिङ, सामूहिक लगानी कोष र व्यापार उपसमूहको परिसूचक घटे । बाँकी सबैको परिसूचक बढे । यसअनुसार बैंकिङ उपसमूहको परिसूचक ०.३१, सामूहिक लगानी कोषको ०.०७ र व्यापार उपसमूहको परिसूचक १.१६ प्रतिशतले घट्यो ।

तर, विकास बैंक उपसमूहको परिसूचक १.५१, वित्त कम्पनीको २.३८, होटेल तथा पर्यटनको १.२६, जलविद्युत्को ०.८६, लगानीको ०.०९, जीवन बिमाको ०.०२, उत्पादन तथा प्रशोधनको १.३५, लघुवित्तको ०.३६, निर्जीवन बिमाको ०.२३ र अन्यको ८.९० प्रतिशतले बढेको नेप्सेले जनाएको छ । 

नेप्से बढेसँगै बिहीबार सेयर बजारको आकार कुल बजार पुँजीकरण १५ अर्बले बढेको छ । यसअनुसार गत बुधबार ४५ खर्ब ४२ अर्ब रुपैयाँ रहेको कुल बजार पुँजीकरण बिहीबार ४५ खर्ब ५४ अर्ब रुपैयाँ कायम भएको छ ।