संखुवासभा — भोजपुर र संखुवासभामा फलेको रुद्राक्ष पहिलो पटक किमाथांका नाका हुँदै चीन निर्यात भएको छ।

एक साताअघि मकालु एग्रो एण्ड ट्रेड ले ४ हजार ५ सय केजी रुद्राक्ष किमाथांका हुँदै चीन पठाएको हो।

यसअघि काठमाडाैं हुँदै वा भारतको मार्ग प्रयोग गरेर चीन पठाइँदै आएको रुद्राक्ष अब भने सिधै उत्तरी नाका किमाथांका हुँदै तिब्बत र बेइजिङसम्म पुग्न थालेको छ। यसले समय, लागत र रोजगारी तीनै क्षेत्रमा सकारात्मक प्रभाव पारेको व्यवसायीहरू बताउँछन्।

जहाजमार्फत रुद्राक्ष लैजाँदा धेरै महँगो पर्ने गरेको छ। काठमाडाै‌ंबाट चीन पठाउँदा प्रतिकेजी ७ सय रुपैयाँसम्म ढुवानी खर्च लाग्ने गरेको मकालु एग्रो एण्ड ट्रेडका सञ्चालक राजकुमार घिमिरे बताउँछन्। 'भारत हुँदै लैजाँदा भने प्रतिकेजी करिब १ सय ५० रुपैयाँ खर्च भए पनि ढुवानीमा कम्तीमा दुई महिना लाग्ने समस्या छ,' उनले भने ।

तर किमाथांका नाका प्रयोग गर्दा प्रतिकेजी करिब ३ सय रुपैयाँमै ढुवानी सम्भव भएको छ। समयको हिसाबले पनि किमाथांका हुँदै पठाइएको रुद्राक्ष निकै छिटो चिन पुग्ने गरेको उनले बताए।

व्यवसायीका अनुसार नेपालबाट वार्षिक करिब १ लाख ५० हजार केजी रुद्राक्ष चीन र ४ लाख ५० हजार केजी भारत निर्यात हुने गरेको छ। चीनमा विशेषगरी ५ मुखे रुद्राक्षको माग उच्च रहेको छ। घिमिरेका अनुसार तिब्बत हुँदै बेइजिङसम्म रुद्राक्ष पुग्छ। किमाथांका नाकाबाट पठाउँदा समय छोटिन्छ, लागत घट्छ र स्थानीयलाई रोजगारीको अवसर पनि सिर्जना हुन्छ।

रुद्राक्ष निकासी गर्दा डिभिजन वन कार्यालयबाट छुट पुर्जी लिनु पर्ने व्यवस्था छ। प्रदेश शुल्कस्वरूप ५ प्रतिशत तिर्नुपर्ने हुन्छ भने आन्तरिक राजस्व कार्यालयमा मूल्यको साढे २ प्रतिशत राजस्व बुझाउनुपर्छ।