काठमाडौँ — नेपालको उड्डयन क्षेत्रलाई लक्षित गर्दै आयोजना हुने ‘एभिएसन फुटसल सिजन-२’ को मस्कट सार्वजनिक गरिएको छ ।

मस्कट सार्वजनिकसँगै प्रतियोगिताको औपचारिक यात्रा सुरु भएको आयोजकले जनाएको छ ।

क्याबिन क्रु, पाइलट तथा ग्राउन्ड ह्यान्डलिङसम्बन्धी व्यावसायिक तालिम प्रदान गर्दै आएको उड्डयन प्रशिक्षण संस्था गीता एभिएसन ले खेलकुद र उड्डयन क्षेत्रलाई जोड्ने उद्देश्यसहित आयोजना गर्दै आएको एभिएसन फुटसलको दोस्रो सिजनको सुरुवात मस्कट रिभिलमार्फत गरिएको हो । सार्वजनिक गरिएको मस्कटले प्रतियोगितालाई स्पष्ट पहिचान र थप आकर्षण प्रदान गर्ने विश्वास आयोजकको छ ।

यस सिजनको प्रतियोगितामा बुद्ध एयर, यति एयरलाइन्स, संस्कृति, पर्यटन तथा नागरिक उड्डयन मन्त्रालय, हेलि एभरेस्ट, कैलाश हेलिकप्टर, नेपाल सेना (एयर फोर्स), हिमालय एयरलाइन्स तथा नेपाल विमानस्थल उद्धार तथा अग्नि नियन्त्रण संघको सहभागिता रहनेछ ।

मस्कट सार्वजनिकपछि कार्यक्रमको निरन्तरतास्वरूप पोखराबाट हट एयर बलुनमार्फत ट्रफी रिभिल गर्ने विशेष योजना रहेको गीता एभिएसनका सञ्चालक पाइलट जनक अधिकारी ले जानकारी दिए। उनका अनुसार नेपालमा यस प्रकारको ट्रफी प्रस्तुति पहिलो पटक हुन लागेको हो।