काठमाडौँ — ललितपुर सातदोबाटोस्थित देउराली बहुउद्देश्यीय सहकारी संस्थाका अध्यक्ष रवीन्द्र चौलागाईंलगायत उच्च पदाधिकारीविरुद्ध सम्पत्ति शुद्धीकरणको मुद्दा दर्ता भएको छ । सम्पत्ति शुद्धीकरण अनुसन्धान विभागको सिफारिसमा जिल्ला सरकारी वकिलको कार्यालय ललितपुरले जिल्ला अदालत ललितपुरमा गत साता मुद्दा दर्ता गरेको हो ।

जिल्ला सरकारी वकिलको कार्यालय ललितपुरका सहायक जिल्ला न्यायाधिवक्ता वसन्त अर्यालले उक्त सहकारीका अध्यक्ष चौलागाईं, संस्थाका उपाध्यक्ष एवं चौलागाईंकी श्रीमती पूजा खत्री र मनोज भण्डारी लगायत विरुद्ध मुद्दा दर्ता गर्ने निर्णय गरेका हुन् । 

बचतकर्ताको उजुरीका आधारमा प्रहरी प्रधान कार्यालय, केन्द्रीय अनुसन्धान ब्युरो (सीआईबी) ले संस्थाको बारेमा प्रारम्भिक अध्ययन गरी १७ मंसिर २०८० मा थप अनुसन्धानका लागि सम्पत्ति शुद्धीकरण अनुसन्धान विभागमा पठाएको थियो । सोहीअनुसार सम्पत्ति शुद्धीकरण विभागले देउराली बहुउद्देश्यीय सहकारी संस्थाको बारेमा थप अनुसन्धान गरेको थियो ।

अनुसन्धानमा विभागले अध्यक्ष चौलागाईंलगायत राजेन्द्र खत्री, दीपक केसी, पूजा खत्री र मनोज भण्डारीले सहकारीको रकम अपचलन गरेको भेटिएको छ । उनीहरूले सातदोबाटोस्थित सहकारी र शाखा कार्यालयहरू न्युरोड, काठमाडौं र भक्तपुरमा रहेको बचत रकम अपचलन गरेको अनुसन्धानमा खुलेको छ ।

सहकारीकै रकमबाट रवीन्द्र चौलागाईंसमेतको नाममा काठमाडौं, भक्तपुर, ललितपुर, काभ्रेपलाञ्चोक र झापा जिल्लालगायतका स्थानहरूमा घडेरीसमेतका जग्गाजमिन खरिद गरेको, निजहरूको नाममा विभिन्न कम्पनी खडा गरी लगानी गरी सम्पत्ति शुद्धीकरणको कसुर गरेको हुन सक्ने विभागको निष्कर्ष छ । 

सोही कारण प्रतिवादीहरू रवीन्द्र चौलागाईं, पूजा खत्री र राजेन्द्र खत्रीसमेतलाई तत्काल प्रचलित सम्पत्ति शुद्धीकरण (मनी लाउन्डरिङ) निवारण ऐन, २०६४ र सम्पत्ति शुद्धीकरण (मनी लाउन्डरिङ) निवारण ऐन, २०६४ बमोजिम २ अर्ब ६८ करोड ५१ लाख १६ हजार ४ सय ३१ रुपैयाँ बाउन्न पैसा मात्र) बिगो कायम गरी मुद्दा दर्ता गरिएको छ ।

प्रतिवादीहरू अध्यक्ष चौलागाईं, पूजा खत्री र राजेन्द्र खत्रीसमेतले कसुरबाट आर्जन गरेको निजको नाममा रहेको घरजग्गासमेतका सम्पत्ति जफत गर्न पनि माग गरिएको छ । राजेन्द्र खत्री चौलागाईंका जेठान हुन् ।

प्रतिवादी रवीन्द्र चौलागाईं सम्पत्ति शुद्धीकरण निवारण प्रयोजनार्थ सूचक संस्थाका रूपमा रहेको सहकारी संस्थाको अध्यक्ष र निजकी पत्नी पूजा खत्री सोही सहकारी संस्थाको उपाध्यक्ष पदमा रही कसुर गरेको देखिएकाले उनीहरू दुई जनाको हकमा ऐनको दफा ३० बमोजिमको सजायमा थप गरी सजाय तोक्नुपर्ने माग गरिएको छ । अर्का प्रतिवादी मनोज भण्डारीको हकमा भने ऐनबमोजिम सजाय र उनको नाममा रहेका घरजग्गासमेत जफत गर्न माग गरिएको छ ।

काभ्रे कात्तिके देउरालीका चौलागाईंले २०७१ सालमा देउराली बहुउद्देश्यीय सहकारी संस्था स्थापना गरेका थिए । सातदोबाटोमा मुख्य कार्यालय रहेको सहकारीले न्युरोड र भक्तपुरको सूर्यविनायकमा पनि शाखा सञ्चालन गरेको थियो ।