काठमाडौँ — जनमत पार्टीका अध्यक्ष सीके राउतले नेपाली समाजमा धनीलाई नकारात्मक रूपमा हेर्ने मानसिकता गहिरो रूपमा विकास भएको टिप्पणी गरेका छन् ।

उद्योग वाणिज्य महासंघले बुधबार काठमाडौंमा शान्ति, स्थायित्व र समृद्धिका लागि सहकार्य शीर्षकमा आयोजना गरेको बृहत् भेलालाई सम्बोधन गर्दै उनले धनी व्यक्ति देश लुटेर बनेका हुन् र निजी क्षेत्र देश लुट्न आएको हो भन्ने धारणा समाजमा व्याप्त रहेको बताए । 

'हामी धनीलाई नराम्रो सोच्ने मानसिकतामा हुर्कियौं । धनी भएका मान्छे यो देश लुटेर हो भन्ने भाष्य बनाइएको छ,' उनले भने, 'यसलाई परिवर्तन गर्न कसैले गम्भीर रूपमा काम गरेन'

सीके राउतले नेपालमा आधारभूत केही विषयमा नै कमजोरी र त्रुटि रहेको उल्लेख गर्दै निजी क्षेत्रलाई संरक्षण गर्ने स्पष्ट राजनीतिक दर्शन बोकेको शक्ति सत्तामा पुग्न आवश्यक रहेको बताए । 'निजी क्षेत्रलाई संरक्षण गर्ने राजनीतिक दर्शन गर्ने शक्ति सत्तामा पुग्नुपर्छ,' उनले भने, 'आवश्यक परे निजी क्षेत्रमैत्री राजनीतिक विचारसहित नयाँ राजनीतिक दल खोलेर भए पनि अघि बढ्नु पर्छ ।'