काठमाडौँ — नेपाल चेम्बर अफ कमर्शका अध्यक्ष कमलेशकुमार अग्रवालले अहिले अर्थतन्त्र संक्रमणकालीन अवस्थामा रहेकाले उद्यमी व्यवसायीहरुको मनोवल उकास्न आवश्यक रहेको बताएका छन् । 

नेपाल उद्योग वाणिज्य महासंघको बुधबार काठमाडौंमा आयोजना गरेको ‘शान्ति, स्थायित्व र समृद्धिका लागि सहकार्य’ विषयक सर्वपक्षीय राष्ट्रिय संवादमा बोल्दै अध्यक्ष अग्रवालले शान्ति, स्थायित्व र समृद्धिका लागि सहकार्य–नेपालको भविष्यसँग गाँसिएको एक अत्यन्तै महत्वपूर्ण विषय भएको बताए । 

‘सरकार प्रमुख राजनैतिक दल निजी क्षेत्र र युवा पुस्ता सबैको सहकार्य नभइकन शान्ति, स्थायित्व र समृद्धिको कल्पना पनि गर्न नसकिने अवस्था अहिले विद्यमान छ,’ उनले भने, ‘नेपाल केवल विश्व मानचित्रमा भौगोलिक सीमाले मात्रै चिनिने देश हैन, यो सहिष्णुता, विविधता र सहअस्तित्वको जिवन्त उदाहरण पनि हो ।’

करिब ६ वर्षदेखि नै कोभिडले प्रभावित अर्थतन्त्रको कुशल व्यवस्थापन हुन नसकेर, अर्थतन्त्र शिथिल अवस्थामा रहेकै बेला हालै जेन-जी पुस्ताले गरेको आन्दोलनका क्रममा मानवीय क्षति , धेरै युवाहरुको सहादत, औद्योगिक व्यावसायिक प्रतिष्ठानहरु एवं निजी सम्पत्तिहरुमा ठूलो क्षति भएको उनले बताए । यसले समग्र व्यावसायिक  एवं औद्योगिक वातावरणमा नकारात्मक असर पुग्नुको साथै निजी क्षेत्रको मनोबल अत्यन्तै न्यून हुन गएको उनको भनाइ छ ।