ताप्लेजुङ — तमोर–मेवा जलविद्युत आयोजनाको उत्पादन क्षमता १ सय ४५ मेगावाट हुने भएको छ ।

१ सय २८ मेगावाटको अनुमति पाएको स्पार्क हाइड्रोपावरले तमोरकै पानीबाट थप १७ मेगावाट विद्युत उत्पादन हुने जनाएको हो ।

स्पार्क हाईड्रो ईलेक्ट्रिक कम्पनी लिमिटेडका संस्थापक अध्यक्ष सञ्चालक तथा पव्लिक रिलेशन प्रमुख भानेन्द्र लिम्बूका अनुसार सुरुको डिजाइजनमा थाङने खोल्सानजिकबाट ५ किलोमिटर लामो सुरुङमार्गमार्फत पानी प्रवाह भइ गुँहेलीनजिक रहेको पावरहाउसमा पानी झार्ने योजना थियो ।

अहिले हाङदेवा कटहरेदेखि डेढ किलोमिटर हेडरेस पाइपमार्फत पानी ल्याउने र थाङ्नेखोला नजिकबाट भूमिगत सुरुङमार्गमार्फत गुँहेलीको पावर हाउसमा खसाइने योजना रहेको छ । हाङदेवा कटहरेदेखि डेढ किलोमिटर हेडरेस पाइपमार्फत पानी ल्याउने उनले बताए । ‘विद्युतमा प्रारम्भिक चरणको अध्ययनमा पछि थपघट हुन्छ । यहाँ पनि त्यस्तै भएको हो,’ लिम्बूले भने ।

मुख्य संरचना भूमिगत भए पनि पावर हाउस भने बाहिरै हुने लिम्बूले बताए । उनका अनुसार अहिलेसम्म २२ प्रतिशत काम भएको छ । पावर हाउस, इन्टेकलगायतका संरचनाका आधारभूत पूर्वाधार, मुख्य कार्यालय, कर्मचारी, कामदार आवास भवनसहितका संरचना पूरा भएको र आयोजना स्थलमा पुग्ने मुख्य सडक समेत ग्राभेल तहको पूरा भइसकेको उनले जानकारी दिए। अबको अढाईदेखि तीन महिनासम्म मुख्य संरचनामा ब्लास्टिङको काम सुरु हुने उनले बताए ।

आइतबार फुङलिङमा आयोजित पत्रकार भेटघाटमा लिम्बूले निरन्तर गतिमा काम बढेकाले २०८५ असोज २५ सम्ममा विद्युत उत्पादन हुने दाबी गरे । प्रारम्भिक अध्ययनमा तमोर र मेवाको पानी मिसाएर १ सय १ मेगावाट उत्पादन गर्ने उल्लेख थियो ।

आयोजनाका लागि आवश्यक ब्लास्टिङका लागि प्रक्रियाअघि बढेको र अढाईदेखि तीन महिनाभित्र सेनाको ब्यारेक बसेपछि सुरुङ मार्ग निर्माण प्रारम्भ हुने लिम्बूले जानकारी दिए। आयोजनाको कुल लागत २६ अर्ब रुपैयाँ रहेको छ । बैंक तथा बित्तीय संस्थाको ऋण लगानी ७५ प्रतिशत अर्थात १७ अर्ब ६८ करोड र बाँकी २५ प्रतिशत अर्थात् ८ अर्ब ३२ करोड स्वपुँजी (ईक्विटी) हुने लिम्बूले बताए ।

अहिलेसम्मका सबै काम स्वपुँजीबाट हुँदै आएको उनले बताए । अन्य जलविद्युत आयोजनाको तुलनामा यो सस्तो लागतमा तयार हुने दाबी गरिएकाे याे आयाेजनाकाे लागत प्रतिमेगावाट १८ करोडभन्दा कम हुने लिम्बू बताउँछन् । आयोजनाका लागि सिद्धार्थ बैंक लिमिटेडको अगुवाइमा माछापुच्छ्रे, कृषि विकास, नेपाल एसबीआई, ज्योति विकास, आईसिएफसी फाइनान्स, नेपाल फाइनान्स, गुडविल फाइनान्स लिमिटेड साझेदार बैंकको रूपमा रहेका छन् ।