काभ्रे — गत कात्तिकमा जिल्लास्थित आईटी पार्कमा उद्घाटन गरिएको सुरक्षित मुद्रण केन्द्रमा सवारी चालक अनुमति पत्र (स्मार्ट ड्राइभिङ लाइसेन्स) छपाइमा ढिलासुस्ती भइरहेको छ । लाइसेन्स छपाइका लागि सञ्चालनमा आएको सुरक्षित मुद्रण केन्द्रमा यातायात व्यवस्था विभागबाट आवश्यक ‘डाटा’ समयमै प्राप्त हुन नसक्दा छपाइ प्रक्रियामा ढिलासुस्ती भएको केन्द्रका कार्यकारी निर्देशक देवराज ढुंगानाले जनाए । 

विभागको मुख्य ‘सफ्टवेयर’ र ‘मिडलवेयर’ प्रणाली पूर्णरूपमा सञ्चालनमा नआएकाले लाइसेन्स छपाइका लागि आवश्यक विवरण ‘म्यानुअली’ संकलन गर्नुपरेको छ । ‘बल्क डाटा’को सुविधा नहुँदा एकैपटक हजारौं लाइसेन्स छपाइ गर्न नसकिएको र दिनको तीन–चार सय ‘डाटा’ मात्र तान्न सकिने अवस्था रहेको ढुंगानाले बताए ।

गत २१ कात्तिकमा सञ्चार तथा सूचना प्रविधिमन्त्री जगदीश खरेलले सुरक्षण मुद्रण केन्द्रमा लाइसेन्स छपाइको अपौचारिक उद्घाटन गरेका थिए । त्यति बेला केन्द्रमा दिनको ५ सय लाइसेन्स छाप्ने भनिए पनि उक्त संख्यामा काम भएको छैन । ‘सुरुवातमा दैनिक ५ सय लाइसेन्स छपाइ गर्ने योजना रहे पनि हाल विभागबाट सातामा दुई पटक मात्र डाटा उपलब्ध गराइरहेको छ,’ ढुंगानाले भने, ‘एक पटकमा कहिले पाँच–सात सय त कहिले १ हजारसम्म डाटा आउने गरेको र प्राप्त डाटाका आधारमै छपाइ तथा वितरण गर्नुपर्ने अवस्था छ ।’

उद्घाटन भएयता केन्द्रमा हालसम्म करिब ७ हजार लाइसेन्सका लागि ‘डाटा’ प्राप्त भएकामा करिब ६ हजार लाइसेन्स छापेर वितरण गरिएको उनले जनाए । बाँकी ‘डाटा’ पनि दुई दिनभित्र छापेर वितरण गरिने तयारी छ । प्रिन्टिङ कम्पनीले आफूहरू सेवा प्रदायक मात्र भएको र ‘डाटा’ उपलब्ध गराउने, प्रणाली सञ्चालन तथा सेवाग्राहीको विवरणको सम्पूर्ण जिम्मेवारी यातायात व्यवस्था विभागकै रहेको जनाएको छ । विभागबाट सफ्टवेयर प्रणाली पूर्णरूपमा सञ्चालनमा आएपछि छपाइ प्रक्रिया तीव्र हुने अपेक्षा गरिएको ढुंगानाको भनाइ छ । 

पहिलो चरणमा अत्यावश्यकसहित १२ लाख ‘लाइसेन्स’ छपाइ गर्ने केन्द्र र विभागबीच सहमति भएको थियो । हाल देखिएका प्राविधिक समस्या समाधान भएको अवस्थामा ६ महिनाभित्र छपाइ प्रणाली पूर्णरूपमा कार्यान्वयन गर्ने लक्ष्य लिइएको ढुंगानाले बताए ।