सिन्धुपाल्चोक — पहिरो नियन्त्रणको माग गर्दै स्थानीयले सडकमा धर्ना दिएपछि जिल्लाको भोटेकोसी गाउँपालिका-२ तातोपानीबाट चीन जोड्ने उत्तरी नाका तातोपानी चार दिनदेखि ठप्प छ ।

सीमा जोड्ने सडक (२६ किलोमिटर) को इको पहिरो, कोप्लाङ र १० किलो आसपास सडक बिग्रेको १० वर्ष बितिसकेको छ ।

सरकारी निकायले करोडौं खर्चेर पनि पहिरो नियन्त्रण गर्न नसक्दा यहाँका झण्डै चार सय घरधुरी जोखिममा पर्दा आक्रोशित स्थानीयले धर्ना गर्दै नाका बन्द गरेका हुन् ।

भोटेकोसी-२ का अध्यक्ष कुमार श्रेष्ठकाअनुसार कोदारी खण्ड क्रमशः भास्सिएर पहिरो गएसँगै चौकीडाँडा, मिलन बजार, लालवीर चोक, कोदारी गुम्बा, कुदुङ, ताक्पासा, तार्तुङ, क्युसा, छेर्माङ, डमार र तामाङ गुम्बालगायत क्षेत्रका करिब चार सय घरधुरी जोखिममा परेको छ  । 'बर्खाभर गाउँ पहिरोमा बगिरहने, हिउँदमा चुप बस्ने,  बर्खा लागेपछि र पहिरो खोतल्ने गर्दा गाउँ नै जोखिममा पर्‍यो, यहाँको आवाजलाई कहिले सुनिन्छ ?,' वडाध्यक्ष श्रेष्ठले भने ।

सडक डिभिजन कार्यालय चरिकोटले विभिन्न समयमा दिएको ठेक्काले  पहिरो नियन्त्रण प्रभावकारी नभएको स्थानीयको गुनासो छ । वडावासी सबै जम्मा भएर पहिरोमा धर्ना बसेको र इको पहिरो नियन्त्रणका लागि तत्काल काम सुरु गर्न सडक डिभिजन र ठेकेदारलाई दबाव दिएको स्थानीयले बताएका छन्  । पहिरो नियन्त्रणका लागि स्पष्ट बजेट सुनिश्चित भएपछि मात्र धर्ना हटाउने उनीहरूको अडान छ ।

पाँच दिनदेखि सडक अवरुद्ध रहे पनि कुनै सरकारी निकायका अधिकारी नाका पुगेका छैनन् । धर्नास्थलमा बसेका स्थानीयले कोदारी बस्ती र व्यापारिक नाका जोगाउन दीर्घकालीन उपाय अनिवार्य भएको बताउँदै आएका छन् । तर इको पहिरो नियन्त्रणका लागि ४८ करोड ४९ लाख रुपैयाँ स्रोत सुनिश्चित भएको सरकारी दाबी छ ।

कन्टेनरमा फलफूल कुहिने थाले

चीनको खासा र न्यालम नाकामा नेपाली व्यापारीका झण्डै तीन सय कन्टेनर फलफूल २५ दिनदेखि रोकिँदा कुहिने थालेको छ । इको पहिरो नियन्त्रणका लागि बजेट सुनिश्चित गर्नुपर्ने माग राखेर तातोपानी–कोदारी खण्डमा स्थानीयले गरेको विरोधका कारण सडक शनिबारदेखि अवरुद्ध छ ।

सडक बन्द हुँदा नेपालतर्फ २० चिनियाँ कन्टेनर पनि लिपिङमा रोकिएका छन् । पुराना फलफूल व्यवसायी शारदाप्रसाद पराजुलीका अनुसार नाका अवरुद्ध हुँदा तीन सय कन्टेनर स्याउ कुहिने अवस्थामा पुगेको छ । 

७० करोड रुपैयाँ बराबरको स्याउ र किवी खतरा क्षेत्रमा पुगेको उनको भनाइ  छ । ‘हाम्रो कुनै गल्ती छैन, तर कन्टेनर  रोकेको असर व्यापारीमात्र होइन दुवै देशको व्यापारमा पर्न थालेको छ,’ उनले भने ।