पर्सा — वीरगन्ज नाकाबाट चालु आर्थिक वर्षको प्रथम चौमासिक अवधिमा भटमासको तेल, सूर्यमुखीको तेल र प्रशोधित पामको तेलको निकासी ह्वात्तै बढेको छ । गत आवको सोही अवधिको तुलनामा यी तेलको निकासी उत्साहजनक रूपमा वृद्धि भएको हो ।

चालु आवको प्रथम चौमासिक अवधिमा यो नाका हुँदै १७ अर्ब ३२ करोड रुपैयाँबराबरको ८ करोड ४० लाख लिटर भटमासको तेल भारततर्फ निकासी भएको छ । गत आवको यसै अवधिमा यो नाकाबाट २ अर्ब २ करोड रुपैयाँबराबरको ८७ लाख ६४ हजार लिटर भटमासको तेल निकासी भएको थियो ।

त्यसैगरी, चालु आवको प्रथम चौमासिक अवधिमा यो नाका हुँदै २ अर्ब ९ करोड रुपैयाँबराबरको ३ करोड २४ लाख लिटर सूर्यमुखीको तेल भारततर्फ निकासी भएको छ । गत आवको सोही अवधिमा यो नाका हुँदै १ अर्ब ११ करोड रुपैयाँबराबरको ६४ लाख ८९ हजार लिटर सूर्यमुखीको तेल निकासी भएको थियो ।

चालु आवको प्रथम चौमासिक अवधिमा यो नाका हुँदै १ अर्ब ५४ करोड रुपैयाँबराबरको ८५ लाख १४ हजार लिटर प्रशोधित पाम तेल भारततर्फ निकासी भएको छ । गत आवको सोही अवधिमा ४ करोड रुपैयाँबराबरको २ लाख २३ हजार लिटर प्रशोधित पाम तेल भारततर्फ निकासी भएको थियो ।