पर्सा — भारतीय रेल्वेको रोकावटले वीरगन्ज नाकाबाट हुने आयात निर्यात व्यापार नै प्रभावित भएको छ ।

करिब डेढ महिनाअघि सुरु भएको यो समस्या हालसम्म विद्यमान नै रहेको सरोकारवालाले गुनासो गरेका छन् । दसैंअघि नै भारतीय रेल्वेले एकतर्फी रुपमा नेपाल तर्फको रेल्वे र्याक साविकको जस्तो उपलब्ध नगराएर नियन्त्रण लगाउँदै आएको थियो ।

त्यसपछि मोन्था आँधीले गराएको वर्षा, भारतकाे कोलकातामा हुने दुर्गा पूजाको भीडभाड, विहार राज्यमा भएको चुनावलगायतका कारण भारतीय रेल्वेले नेपाल तर्फको र्याक घटाउँदै लगेको छ ।

नेपालको कूल आयात-निर्यात व्यापारको आधा भन्दा बढी वीरगन्ज नाकाबाट हुने गरेको छ । यस्तो अवस्थामा रेल्वे सेवामा देखिएको अवरोधले समग्र नेपालकै आयात निर्यात व्यापार प्रभावित हुने सराेकारवाला बताउँछन् । रेल्वे र्याकमै गरिएकाे नियन्त्रणले नेपाली आयातकर्ताको मालबस्तु समयमा आउन नसकेपछि औद्योगिक उत्पादनदेखि व्यापारमा समेत प्रत्यक्ष प्रभाव परेको छ ।

वीरगन्ज भन्सार कार्यालयका भन्सार एजेन्ट सुरेश दासले आफ्नो पार्टीको एउटा कन्टेनर डेढ महिनादेखि भारतको दरभंगास्थित रेल्वे मार्गमा अड्किएको गुनासो गरे । लामो समय कन्टेनर भारतमै अडकिँदा आयातकर्ताले कन्टेनरको बिलम्ब शुल्क समेत अनावश्यक रुपमा सिपिङ लाइन कम्पनीलाई तिर्नुपर्ने उनले बताए । नेपालका थुप्रै आयातकर्ताको कन्टेनर भारतीय रेल्वको आन्तरिक समस्याले भारतको बिभिन्न बन्दरगाह तथा रेल्वे मार्गमै अड्किएर बसेको उनले गुनासो गरे ।

वीरगन्ज उद्योग वाणिज्य संघका वरिष्ठ उपाध्यक्ष माधव राजपालले यो समस्याले नेपालका थुप्रै आयातकर्तालाई प्रभाव पारेको बताए । रेलमार्गबाट कन्टेनर तथा बल्क कार्गोका बस्तु ढुवानी गर्दा तुलनात्मक रुपमा सस्तो पर्ने भएकाले नेपाली आयातकर्ताले सिर्सिया सुक्खा बन्दरगाहमा उपलब्ध रहेको रेल मार्फत आयात-निर्यात गर्न रुचाउँछन् । तर पछिल्लो समय भारतीय रेल्वेको स्वनियन्त्रण र रोकावटले रेलबाट हुने आयात निर्यात कष्टकर हुँदै गएको उनले बताए ।

कोलकातास्थित प्रिष्टिन लजिस्टिक कम्पनीका पूर्वीक्षेत्रका प्रमुख पार्थ चौधरीले भारतीय रेलसेवामा पछिल्लो समयमा अत्यधिक रोकावट भइरहेको बताए । हाल भने भारतीय रेल्वेले आफ्नो रेलमार्गका कतिपय स्थानमा मर्मत कार्य भइरहेको बताउँदै रेल सेवा प्रभावित भएको दाबी गरिरहेको उनले बताए ।

उनले मंसिर १० सम्म नेपाली कार्गो ढुवानी गर्ने रेल सेवाको रोकावट हुने सूचना आएको बताए । यो रोकावट थप केही दिन लम्बिन सक्ने सम्भावना रहेको उनले बताए ।

कोलकातास्थित नेपाली महावाणिज्य दूतावासका महावाणिज्यदूत झक्कप्रसाद आचार्य पनि नेपाली आयात-निर्यातकर्ताबाट यो गुनासो निरन्तर आइरहेको बताउँछन् । ‘नेपाली आयात निर्यातकर्ताको निरन्तर गुनासो आइरहेको छ,’ उनले भने, ‘यस सम्बन्धमा हामीले भारतीय रेल्वे अधिकारीसँगै प्रत्यक्ष संवाद गरिरहेका छौं ।’