काठमाडौँ — विनस्टार क्यासिनो प्रालिमा सेयरबापत लगानी गरिएको साढे ३ करोड रुपैयाँको हिसाब नदेखिएपछि सिद्धार्थनगर–१०, का दीपक पाण्डेले रकम फिर्ता गरिदिन हारगुहार गरेका छन् ।

रूपन्देहीको ओमसतिया–४, वसन्तपुरस्थित बोधी रेडसन होटल परिसरमा सञ्चालन तयारी भइरहेको विनस्टार क्यासिनोमा २५ प्रतिशत सेयर कायम गर्ने सहमतिमा ३ करोड ४० रुपैयाँ लगानी गरेको पाण्डेको भनाइ छ । सम्झौताविपरीत आफूलाई अलपत्र बनाइएको उनले बताए ।

रकम लेनदेन गर्न क्यासिनोकी सञ्चालक काठमाडौं महानगरपालिका–४, की प्राप्ति पोखरेल र पाण्डेबीच गत वैशाख २४ गते सम्झौतापत्रमा हस्ताक्षर भएको छ । उक्त सम्झौतापत्रमा क्यासिनोमा २५ प्रतिशत सेयर कायम हुने गरी पाण्डेले सञ्चालक पोखरेललाई ४ करोड ७५ लाख बुझाउनुपर्ने उल्लेख छ । उक्त रकममध्ये पोखरेललाई ३ करोड ४० लाख रुपैयाँ बुझाइसकेको पाण्डेले दाबी गरेका छन् । 

सम्झौता अनुसार क्यासिनोको सेयर प्राप्त नभएको र सञ्चालकले कम्पनी रजिस्ट्रार, पर्यटन विभाग लगायत सरकारी निकायमा एकल स्वामित्वका कागजात पेस गरेपछि पाण्डेले अन्यायमा परेको जनाउँदै सरोकारवाला निकायमा उजुरी गरेको बताए । यसबीच क्यासिनोको नामसमेत परिवर्तन गरेर इजाजतपत्र लिन प्रयास गरिएको पाण्डेको दाबी छ । विनस्टार क्यासिनो प्रालिमा लगानी सम्झौता गरेर सेयर उपलब्ध नगराएको र सम्झौताविपरीत विनर्स इन्टटेनमेन्ट प्रालिको नामबाट क्यासिनोको नयाँ लाइसेन्स लिन प्रयास गरिएकाले रोक्का गरिपाऊँ भनी पाण्डेले गत कात्तिक ९ गते पाटन उच्च अदालतमा मुद्दा दायर गरेका थिए । 

पाण्डेका अनुसार उच्च अदालतले मंसिर ११ गते साधारण पेसी तोकेको छ । यसबीच ठगी मुद्दा दार्ताका लागि दुईपटक जिल्ला प्रहरी कार्यालय रुपन्देही पुगे पनि उजुरी दर्ता नगरिएको आरोप पाण्डेले लगाए । ‘अहिले मानसिक तनावमा छु,’ उनले भने, ‘मर्नु कि बाँच्नु अवस्थामा पुर्‍याइयो ।’ क्यासिनोमा २५ प्रतिशत सेयर उपलब्ध गराउने सम्झौता गरिसकेपछि पनि हिस्सा प्रदान नगरिएको उनले बताए । आफूले दिएको रकम खर्च गरिसकेपछि कम्पनीबाट अलग्याइएको उनको भनाइ छ । ‘बैंकबाट ऋण निकालेर रकम दिएको हुँ,’ उनले भने, ‘अब कहाँबाट पैसा ल्याएर बैंकमा बुझाऊँ, न्याय माग्न जाँदा प्रहरीले निवेदन दर्ता गर्दैन ।’

होटल बोधी रेडसन प्रालिले पनि शुक्रबार ७ दिने म्याद राखेर सूचना प्रकाशित गरी होटलको पश्चिम उत्तरतर्फ रहेका दुईवटा हलमा सञ्चालन गर्नेगरी होटल व्यवस्थापन र विनस्टार क्यासिनो प्रालिबीच २०८१ माघमा सम्झौता भएको जनाएको छ । उक्त क्यासिनोले २०८१ चैत १ बाट दुवै हल प्रयोग गरे पनि सम्झौताअनुसार अहिलेसम्म धरौटी र बहाल रकम नबुझाएको होटलका सञ्चालक समिति अध्यक्ष प्रमोदकुमार यादवले जारी गरेको सूचनामा उल्लेख छ । पटकपटक सम्पर्क गर्दा समेत कुनै चासो नदिएकाले सूचना प्रकाशन गरेको ७ दिनभित्र होटललाई तिर्नुपर्ने सम्पूर्ण रकम चुक्ता गर्न र नगरेको खण्डमा सूचनालाई आधार मानी होटल र कम्पनीबीचका सम्पूर्ण सम्झौता रद्द हुने जानकारी गराइएको छ ।