भदौ २४ गतेको प्रदर्शनका क्रममा क्षति भएका सार्वजनिक भौतिक संरचना पुनर्निर्माणका लागि सरकारले स्थापना गरेको थियो । कोषमा आइतबारसम्म ९ करोड ३० लाख रुपैयाँ मात्र संकलन भएको छ ।
काठमाडौँ — सार्वजनिक संरचनाको पुनर्निर्माणका लागि सरकारले स्थापना गरेको भौतिक पूर्वाधार पुनर्निर्माण कोषमा आइतबार लाइफ इन्स्योरेन्स कर्पोरेसन (नेपाल)ले एक करोड एक लाख रुपैयाँ सहयोग गरेको छ ।
कम्पनीका प्रमुख कार्यकारी अधिकृत प्रणय कुमारले सहयोग रकमको चेकको भौचर अर्थमन्त्री रामेश्वर खनाललाई हस्तान्तरण गरेका हुन् ।
त्यसैगरी भौतिक पूर्वाधार पुनर्निर्माण कोषमा जम्मा हुने गरी एफवान सफ्ट ग्रुपमा आवद्ध एफवान सफ्ट इन्टरनेसनल, इसेवा लिमिटेड र फोनपे पेमेन्ट सर्भिस लिमिटेडका कर्मचारी तथा उक्त कम्पनीहरुको संयुक्त योगदान हुने गरी ७५ लाख रुपैयाँ सहयोग गरेको छ । आइतबार उक्त ग्रुपको तर्फबाट अध्यक्ष सिद्धान्त ठकुरीले अर्थमन्त्री खनाललाई चेक हस्तान्तरण गरेका हुन् ।
भदौ २४ गतेको प्रदर्शनका क्रममा क्षति भएका सार्वजनिक भौतिक संरचना पुनर्निर्माणका लागि सरकारले स्थापना गरेको थियो । कोषमा आइतबारसम्म ९ करोड ३० लाख रुपैयाँ मात्र संकलन भएको छ ।
सार्वजनिक संरचनाको पुनर्निर्माणका लागि सरकारले गत असोज ८ गते राष्ट्रिय वाणिज्य बैंकमा ‘भौतिक पूर्वाधार पुनर्निर्माण कोष’को नाममा बैंक खाता खोलेर स्वेच्छिक रूपमा सहयोग गर्न सबैलाई आग्रह गरेको थियो । जसअनुसार व्यक्ति र संस्था गरेर करिब सवा ९ करोड रुपैयाँ बराबर सहयोग गरिएको अर्थ मन्त्रालयले जनाएको छ ।
कोषमा हालसम्म सहयोग गर्नेहरूमा संस्था कम र व्यक्ति धेरै रहेका छन् । रकमका आधारमा सबैभन्दा बढी डेढ करोड रुपैयाँसम्म संकलन भएको छ भने एक दर्जनभन्दा बढी व्यक्तिबाट एक रुपैयाँ प्राप्त भएको स्रोतले जनाएको छ ।
प्रदर्शनका क्रममा सरकारी र निजी दुवै क्षेत्रमा ठूलो क्षति भएको छ । क्षतिको आकलन अझै हुन सकेको छैन । यद्यपि अर्थ मन्त्रालयका अधिकारीहरूले सरकारी र निजी क्षेत्र गरी १ खर्बभन्दा बढीको क्षति भएको प्रारम्भिक तथ्यांक देखिएको बताएका छन् । निजी क्षेत्रको छाता संगठन नेपाल उद्योग वाणिज्य महासंघले ८० अर्बभन्दा बढी निजी सम्पत्तिमा क्षति पुगेको दाबी गरेको छ ।
यता सरकारले क्षतिको विवरण र पुनर्निर्माण लागतका लागि अध्ययनको काम सुरु गरेको छ । सो कामका लागि ४५ दिनको समय दिइएको छ ।
