काठमाडौँ — नेपाल उद्योग वाणिज्य महासंघ (एफएनसीसीआई) का वरिष्ठ उपाध्यक्ष अन्जन श्रेष्ठले ‘जेनजी’ प्रदर्शनपछि निजी क्षेत्रले आफ्नो ‘आत्मविश्वास’ गुमाएको बताएका छन्।

समृद्धि फाउन्डेसनको ‘एकसाथ निर्माण: निजी क्षेत्रले नेपालको अर्को अध्यायलाई कसरी हेर्छ?’ भन्ने संवाद–समृद्धि शृङ्खलामा उनले यस्तो बताएका हुन्। ‘विभिन्न आन्दोलनका क्रममा निजी क्षेत्रलाई असर पर्थ्यो, क्षति हुन्थ्यो, तर त्यो त्यही ठाउँमा सीमित हुन्थ्यो,’ श्रेष्ठले भने, ‘तर जेनजी प्रदर्शनका क्रममा व्यक्तिको घर–घरमै पुगेर तोडफोड गरियो।’

सबैभन्दा सुरक्षित मानिने घरमै आक्रमण भएपछि निजी क्षेत्रको आत्मविश्वास गुमेको उनले बताए। ‘जेनजी प्रदर्शन दुई दिन भयो, तेस्रो–चौथो दिन केही नभएजस्तो देखिनु निजी क्षेत्रकै कारण हो,’ उनले भने, ‘जेनजी प्रदर्शनका क्रममा क्षति हुँदा पनि भाटभटेनीका मीनबहादुर गुरूङले “खरानीबाट उठ्छु” भन्नुभएको छ। यसबाट भाग्ने ठाउँ छैन, यहीँबाट अघि बढ्नुपर्छ भन्ने उहाँको धारणा छ।’

प्रदर्शनका क्रममा सरकारी संरचनामा बढी क्षति पुगे पनि सरकारी प्रणाली चलायमान हुन समय लागेको उनले उल्लेख गरे। तर निजी क्षेत्र भने दुई–तीन दिनमै उठेर सफासुग्घर गरी अघि बढिसकेको उनले बताए । निजी क्षेत्रलाई हेर्ने, बुझ्ने र मूल्यांकन गर्ने दृष्टिकोण नै परिवर्तन गर्नुपर्ने उनको जोड थियो।

आर्थिक चलायमानता कमजोर हुँदा रोजगारी सिर्जना हुन नसकेको उनले बताए। २०४८ पछि मुलुक खुला अर्थतन्त्रतर्फ उन्मुख भए पनि त्यअनुसार आर्थिक वृद्धि हुन नसकेको उनको भनाइ छ। खुला अर्थतन्त्रको जगले नै मुलुक आजको अवस्थामा पुगेको पनि उनले उल्लेख गरे।