काठमाडौँ — श्रम, रोजगार तथा सामाजिक सुरक्षा मन्त्रालयले वैदेशिक रोजगारमा जाने श्रमिकको स्वास्थ्य परीक्षण गर्न १ सय ७१ वटा स्वास्थ्य संस्थालाई सूचीकरण (छनोट) गरेको छ ।

स्वास्थ्य परीक्षणलाई गुणस्तर, व्यवस्थित र पारदर्शी बनाउन भन्दै मन्त्रालयले जारी गरेको नयाँ कार्यविधिको मापदण्ड पूरा गर्ने १ सय ७१ वटा स्वास्थ्य संस्थालाई सूचीकरण गरेको शुक्रबार जारी सूचनामा उल्लेख छ । यो मापदण्ड पूरा नगरेका २९ वटा स्वास्थ्य संस्थालाई मन्त्रालयले सूचीकरणबाट हटाएको छ । 

अब सूचीकरण गरिएका स्वास्थ्य संस्थाले मात्रै वैदेशिक रोजगारमा जाने श्रमिकको स्वास्थ्य परीक्षण गर्न पाइनेछ । विशेषज्ञ समितिबाट अनुगमन प्रतिवेदन अध्ययन भई सूचीकरणको लागि सिफारिस भएका स्वास्थ्य संस्थाहरुलाई सूचीकरण गर्ने प्रधानमन्त्री तथा श्रम, रोजगार तथा सामाजिक सुरक्षा मन्त्रीस्तरबाट कात्तिक ३० गते निर्णय भएको हो ।

स्वास्थ्य मन्त्रालयका तत्कालीन अतिरिक्त सचिव दीपेन्द्ररमण सिंह नेतृत्वको ३० सदस्यीय उच्चस्तरीय कार्यदलले पेस गरेको प्रतिवेदनको आधारमा मन्त्रालयले स्वास्थ्य परीक्षणका सामग्री थप, ल्याबको सुधार र स्वास्थ्य परीक्षणको दायरा विस्तार गरेर ‘वैदेशिक रोजगारमा जाने श्रमिकको स्वास्थ्य परीक्षण गर्ने संस्था, सूचीकरण, नवीकरण तथा अनुगमनसम्बन्धी कार्यविधि–२०७२ लाई संशोधन गरिएको हो । त्यस कार्यविधिले निर्धारण गरेको मापदण्डअनुसार अनुगमन टोलीले गत असार २६ देखि असोज ३१ सम्म राजधानी र बाहिर रहेका दुई सय स्वास्थ्य संस्थाको अनुगमन गरेको थियो ।

श्रम प्रवक्ता पिताम्बर घिमिरले सूचीकृत स्वास्थ्य संस्था, चिकित्सक र श्रमिकलाई जिम्मेवार बनाइएको बताए । ‘यसले गुणस्तरीय स्वास्थ्य परीक्षणको सुनिश्चितता गर्नेछ । मेडिकल फिटसम्बन्धी रिपोर्ट दिने गलत अभ्यास अन्त्य हुनेछ,’ प्रवक्ता घिमिरेले भने,‘मन्त्रालयले यसको प्रभावकारी रुपमा अनुगमन गर्नेछ ।’