गएको ६० दिनमा अलिकति द्रुत गतिमै काम गरिएछ कि भन्ने लागेको अर्थमन्त्री खनालको दाबी छ । ‘कतिपय काम समाजले बुझ्नुभन्दा अघि नै गरेकाले त्यसमा आवाज उठिरहेका छन् कि भन्ने पनि लागिरहेको छ,’ उनले भने, ‘विभिन्न मुलुकसँग भएको दोहोरो कर मुक्ति सम्झौतामा रहेका नेपाललाई हानि गर्ने प्रावधान संशोधन गर्नुपर्ने थियो, त्यो काम भइसकेको छ ।’

सोही क्रममा विभिन्न ७ राष्ट्रसँग भएको सम्झौताका केही बुँदा आयकर ऐन, २०५८ को व्यवस्थाभन्दा फरक भएकाले अब आयकर ऐनअनुसार नै कर लाग्छ भनेर सूचना पठाइसकिएको उनले बताए । मुलुकको अर्थतन्त्र चुनौतीपूर्ण अवस्थामा रहेकाले सुधारका लागि सरकारले धेरै प्रयास गर्नुपर्ने नेपाल उद्योग परिसंघका अध्यक्ष वीरेन्द्रराज पाण्डेको भनाइ छ ।

‘बैंकहरूमा लगानीयोग्य रकम छ, ब्याजदर एकल बिन्दुमा छ, समग्र बजार माग बढ्न सकेको छैन । माग बढ्न नसक्दा पनि उद्योग न्यून क्षमतामा सञ्चालन भइरहेका छन्,’ पाण्डेले भने, ‘मूल्य वृद्धि न्यून बिन्दुमा छ । पैसा त्यत्तिकै बस्नु भनेको अर्थतन्त्रका लागि राम्रो संकेत होइन ।’ त्यसको असर सरकारको राजस्वमा समेत पर्दै आएको उनले जनाए ।