काठमाडौँ — काठमाडौं उपत्यकामा ठेक्का भएको लामो समय बित्दा पनि निर्माणमा प्रगति नभएका सडक अन्तर्गतका २५ वटा ठेक्का तोडिएको छ । सडक डिभिजन काठमाडौं अन्तर्गतका ठेक्का तोडिएको हो ।

उक्त कार्यालयले सोमबार सूचना प्रकाशित गरेर ठेक्का तोडिएको उल्लेख गरेको छ । पटक–पटक काम गर्ने मौका दिँदा पनि काममा प्रगति नभएपछि ठेक्का तोडिएको सडक डिभिजन काठमाडौंका प्रमुख सुबोधकुमार देवकोटाले बताए ।

‘५७ रुग्ण ठेक्कामध्ये २५ वटाको ठेक्का तोडियो’, उनले भने, ‘थप ३२ वटा तोड्ने प्रक्रियामा छन् ।’ उनले काम गर्ने मौका दिँदा पनि कामै नभएका र प्रगति नदेखिएका ठेक्का तोडिने बताए । तोडिएका आयोजना आर्थिक वर्ष २०६७/६८ देखि २०७९/८० मा सम्झौता भएका छन् ।

ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकास मन्त्री कुलमान घिसिङले ठेक्का लिने तर काम नगर्ने र आयोजना अलपत्र पार्ने प्रवृत्ति अन्त्यका लागि रुग्ण ठेक्का तोड्न मातहतका निकायलाई निर्देशन दिएका थिए । त्यसपछि सडक विभाग मातहतका कार्यालयले रुग्ण ठेक्का तोड्नका लागि प्रक्रिया अगाडि बढाएका थिए ।

सडक डिभिजन कार्यालय काठमाडौंले गत कात्तिक ११ मा ‘ठेक्का किन नतोड्ने ?’ भन्दै सम्बन्धित २५ निर्माण व्यवसायीलाई स्पष्टीकरण सोधिएको थियो । निर्माण व्यवसायीबाट पेश भएको स्पष्टीकरण चित्तबुझ्दो नभएकाले सार्वजनिक खरिद कानुनमा भएको व्यवस्था बमोजिम ठेक्का रद्द गरिएको सडक डिभिजन काठमाडौंका प्रमुख देवकोटाले बताए ।

कानुनमा भएको व्यवस्था बमोजिम ठेक्का सम्झौता अन्त्य गरी कालोसूचीमा राख्ने तथा कार्यसम्पादन जमानत, धरौटी बापतको रकम, पेश्की जमानत जफत र पेश्की रकमको १० प्रतिशत ब्याज असुल गर्नुका साथै बाँकी काम गर्न लाग्ने खर्च सरकारी बाँकी सरह असुल–उपर गर्ने तर्फ कारबाही अगाडि बढाइने प्रमुख देवकोटाले उल्लेख गरे । निर्माण व्यवसायीलाई १५ दिनभित्र कार्यालयमा उपस्थित हुने निर्देशन दिइएको छ ।