काठमाडौँ — सहकारी विभागले सहकारी संघसंस्थालाई सम्पत्ति शुद्धीकरण निवारणसम्बन्धी व्यवस्थामा कडाइ गर्न निर्देशन दिएको छ । विभागले सम्पत्ति शुद्धीकरण निवारणसम्बन्धी निर्देशन तथा दिग्दर्शन जारी गर्दै सहकारी संघ/संस्थालाई वास्तविक धनी पहिचान गर्न, सदस्य पहिचानलाई प्रभावकारी बनाउन, वित्तीय जानकारी इकाइलाई नियमित रूपमा सीमा/शंकास्पद कारोबारको सूचना दिन र वित्तीय आपराधिक कारोबारको प्रभावकारी नियमन गर्न निर्देशन दिएको हो।

एउटा व्यक्ति वा संस्थाको नाममा खाता सञ्चालन गर्ने तर त्यसको सञ्चालन र कारोबार अरू कुनै व्यक्तिले गर्ने र लाभ लिने गरिएको रहेछ भने वास्तविक धनी पहिचान गर्न विभागले निर्देशन दिएको छ । यस्तै, उच्च जोखिम र शंकास्पद व्यक्ति यकिन गर्दा कुनै व्यक्तिले अर्को व्यक्तिको तर्फबाट व्यावसायिक सम्बन्ध स्थापना वा कारोबार गरेको देखिएमा त्यस्तो व्यक्तिको पहिचान तथा सोको सम्पुष्टि सम्बन्धमा कानुन अनुसार उपाय अपनाइएको छ/छैन त्यो हेर्नुपर्ने निर्देशन छ । 

संस्थाले वास्तविक धनी पहिचान गर्न सदस्यहरूको कारोबार अनुगमन र अनुसन्धान गर्ने तथा त्यसलाई प्रभावकारी बनाउन आवश्यक व्यवस्था मिलाउनुपर्ने निर्देशनमा उल्लेख छ । यस्तै, निर्देशनमा उच्च आर्थिक कारोबार गर्ने सदस्य भन्नाले वार्षिक ३० लाखभन्दा बढी बचत गरेकोेेेेेे वा सेयर खरिद गरेको वा ऋण लिएको हुनुपर्ने भनेर प्रस्ट्याइएको छ ।

‘आर्थिक वा कानुनी उद्देश्य स्पष्ट नदेखिने जटिल, ठूलो वा अस्वाभाविक प्रकृतिको कारोबार गर्ने सदस्य तथा उच्च पदस्थ व्यक्ति र त्यस्तो परिवारको सदस्य तथा निजसँग सम्बद्ध व्यक्ति वा सदस्यका बारेमा बृहत् पहिचान संकलन गर्नुपर्नेछ,’ निर्देशनमा भनिएको छ । 

सहकारीले आफ्ना सदस्य पहिचानका लागि सदस्य पहिचान (नो युओर मेम्बर–केवाईएम) लाई प्रभावकारी बनाउन पनि विभागले भनेको छ । सदस्य पहिचान तथा सम्पुष्टि गर्न कागजात, विवरण तथा जानकारी उपलब्ध नगराउने र उपलब्ध गराएको कागजात विवरण तथा जानकारीका आधारमा सदस्य पहिचान तथा सम्पुष्टि हुन नसक्ने व्यक्तिलाई सदस्य बनाई कारोबार नगर्न पनि विभागद्वारा जारी निर्देशनमा उल्लेख छ ।