काठमाडौँ — साढे तीन दशकअघिसम्म हेलम्बुको स्याउको चर्चा निकै हुन्थ्यो । हेलम्बुको चिनारी नै स्याउ थियो । ०४१/४२ सालबाट स्याउमा रोग लाग्यो । फल्न छाडेपछि किसानले स्याउको बोटै काटेर दाउरा बनाएर प्रयोग गरे । स्याउको बखान कथा जस्तो भयो ।

अब भने हेलम्बुमा फेरि स्याउ फल्न थालेको छ । स्याउको चिनारीलाई कायम राख्न यहाँका बासिन्दाले दशकअघि थालेको प्रयासले फल्न थालेको हो ।

लोभलाग्दा स्याउका बोटले गाउँकै मुहार फेरिएजस्तो भएको छ। यहाँ हजारभन्दा बढी उन्नत प्रजातिका स्याउका बिरुवा रोपिएका छन् । भारतको हिमाचल प्रदेशबाट ल्याएको बिरुवाबाट खेती सुरु गरिएको हो । स्याउ फलेपछि कृषक थप जाँगरिला बनेका छन् ।

'अहिलेसम्म हेलम्बु क्षेत्रमा ६० परिवारले स्याउ खेतीलाई व्यावसायिक खेतीका रूपमा अघि बढाएका छन् । बिक्री गर्न भने थालिएको छैन । बल्ल फल्न थालेको छ,' हेलम्बु गाउँपालिका-५ का वीरजित तामाङले भने ।