पर्सा — वीरगन्ज भन्सार नाकाबाट चालु आर्थिक वर्षको पहिलो तीन महिनाको अवधिमा विद्युतीय सवारीसाधन (ईभी) को आयात ह्वात्तै बढेको छ ।

वीरगन्ज भन्सार कार्यालयका तथ्यांक अनुसार यस अवधिमा यो नाकाबाट ६८ करोड ५ लाख रुपैयाँ मूल्य बराबरका दुई सय २९ वटा विद्युतीय जिप, कार र भ्यानहरू आयात भएका छन् । तिनको आयातबाट ४५ करोड ७२ लाख रुपैयाँ राजस्व संकलन भएको छ ।

गत आर्थिक वर्षको यसै अवधिमा यो नाकाबाट १४ करोड ४९ लाख रुपैयाँ मूल्य बराबरका ९७ वटा विद्युतीय जिप, कार र भ्यानहरू मात्र आयात भएका थिए । जसबाट नौ करोड ११ लाख रुपैयाँ राजस्व संकलन भएको थियो ।

वीरगन्ज नाका नयाँ सवारीसाधन आयात हुने मुलुककै प्रमुख नाका हो । भारत तथा तेस्रो मुलुकमा निर्मित इन्धनबाट चल्ने सवारीसाधनका साथै ईभी पनि यो नाकाबाट उल्लेख्य संख्यामा भित्रिने गरेको छ ।

वीरगन्ज भन्सार कार्यालयका सूचना अधिकृत अमित तिवारीका अनुसार पछिल्ला तीन महिनामा चीनको ओपल र अमेरिकाको टेस्ला ब्रान्डका ईभीहरूको आयात बढेकाले समग्रमा यो नाकाबाट ईभी आयात वृद्धि भएको हो ।