भैरहवा — नेपाल विद्युत प्राधिकरणले डेडिकेडेड फिडर र ट्रंकलाइन वापतको बक्यौंता महशुल नतिरेको भन्दै विद्युत लाइन काटेको बिरोधमा रुपन्देहीका उद्योगीले बिहीबार झरीकै बीच प्रदर्शन गरेका छन् ।

उद्योगले माग नै नगरेको ट्रंकलाइन वापतको महशुल चुक्ता गर्न बाध्य बनाइएकाे भन्दै उद्याेगीले प्रदर्शन गरेका हुन् ।

सिद्धार्थ उद्योग वाणिज्य संघको अगुवाईमा भएको प्रदर्शनमा बन्द उद्योगका कर्मचारी, मजदुर, विभिन्न उद्योग वाणिज्य संघ, रुपन्देही उद्योग संघका सदस्य सहभागी थिए । बिहीबार झरी परे पनि उनीहरुले भैरहवास्थित विद्युत कार्यालयको गेटमा बिहान ११ बजेदेखि १२ बजेसम्म बन्द उद्योगका व्यानर र प्लेकार्ड सहित प्रदर्शन गरेका थिए । 

प्रदर्शनका क्रममा मजदुरले रोजगारी नखोस्न र ट्रकलाइन खपतका लागि माग गरेको प्रमाण देखाउन सरकार समक्ष माग गरका थिए । उनीहरुले सरकारले प्रमाण दिने बित्तिकै महशुल बुझाउने भन्दै नाराबाजी गरेका थिए । उनीहरुले सरकारले नै उद्योगीलाई बदमास देखाउन खोजेको भन्दै आक्रोश व्यक्त गरेका छन् । सिद्धार्थ उद्योग वाणिज्य संघको अगुवाईमा भएको प्रदर्शनमा तिलोत्तमा उद्योग वाणिज्य संघ, उद्योग वाणिज्य संघ बुटवल, रुपन्देही उद्योग संघ, विभिन्न श्रमिक संघ र जिफन्ट नेपालले ऐक्यबद्धता जनाएका छन् ।