सिन्धुपाल्चोक — जिल्लाभर दसैं-तिहार सकिएलगत्तै कृषकलाई धान भित्र्याउने चटारो छ । मौसम परिर्वतनले गर्दा धान पाक्न ढिला भएकाले दसैंलगत्तै कृषक धान भित्र्याउन कस्सिएका हुन्  ।

'असारमा पानी ढिलो गरी पर्‍यो, धान पनि ढिलै पाकेकाले काट्न पनि ढिलै गरियो, असिना पानी पर्ने डरले गर्दा मौसमको भर छैन , त्यसैले धान काट्न हतारिएका हौं ,' बाह्रबिसे नगरपालिका राम्चेका कृषक कृष्ण तिवारीले भने । उनका अनुसार पहिले कात्तिक लागेपछि मात्रै जाडो हुन्थ्यो तर, यसपालि असोजको पहिलो साताबाटै जाडो सुरु भएको छ । ज्याला बढ्नुका साथै खेताला पाउन छोडेपछि धान भित्र्याउन परिवारकै सदस्य मिलेर लागेका छन् । 

'गाउँमा लगभग युवा छैनन्, परिवारका सदस्य मिलेर पालोपर्म गरेर धानबाली भित्र्याइरहेका छौं ,' बलेफी गाउँपालिका फुल्पिङकोटका कृष्ण थापाले भने । थापालाई नयाँ घरको बाससँगै असारभरिको दु:ख रोपाइँ धानको भकारी कस्दा खुब आनन्द लागेको छ ।