काठमाडौँ — व्यक्तिगत सेयर कर्जामा अधिकतम २५ करोडको सीमा हटेको छ । नेपाल राष्ट्र बैंकले बुधबार परिपत्रमार्फत उक्त सीमा हटाएको हो । यसअघि कुनै एक वा सबै बैंक तथा वित्तीय संस्थाबाट सेयर धितोमा प्रवाह हुने मार्जिन प्रकृतिको कर्जाको अधिकतम एकल ग्राहक कर्जा सीमा कुल २५ करोड थियो । 

सरकारले गठन गरेको पुँजीबजारका लागि सुझाव दिन गठित समितिले उक्त सीमा हटाउन सिफारिस गरेको थियो । अर्थ मन्त्रालयले उक्त सुझाव प्रतिवेदन कार्यान्वयन गर्न बुधबार नै निर्देशन दिएको थियो । सोही निर्देशनबमोजिम राष्ट्र बैंकले सेयर कर्जा सीमा हटाएको हो । सेयर कारोबारसम्बन्धी अरु व्यवस्थामा पनि लचिलो नीति अंगीकार गरेको छ । 

अब बैंक तथा वित्तीय संस्थाले ६ महिनासम्मका लागि पनि सेयरमा लगानी गर्न सक्नेछन् । यसअघि एक सर्वसाधारणमा सेयर बिक्री गरी धितोपत्र विनिमय बजार (नेप्से) मा सूचीकृत भइसकेको संगठित संस्थाको सेयर तथा डिबेन्चरमा एक वर्षभन्दा बढी अवधिको लागि मात्र लगानी गर्न पाइने व्यवस्था थियो । त्यो एक वर्षको अवधि घटाएर ६ महिना बनाइएको हो । 

यसरी किनेको एक वर्ष व्यतित भएका लगानीमध्ये एक आर्थिक वर्षमा प्राथमिक पुँजीको २० प्रतिशत रकमसम्मको लगानी मात्र बिक्री गर्न सक्ने व्यवस्था पनि राष्ट्र बैंकले खारेज गरेको छ । यी व्यवस्थाका कारण सेयर बजार बढ्न नसकेको निष्कर्षका आधारमा राष्ट्र बैंकले उल्लिखित व्यवस्था गरेको हो ।