काठमाडौँ — हिमालय एयरलाइन्सले हालको प्रतिकूल मौसमका कारण यात्रामा असर परेका यात्रुहरूको टिकटको मिति हेरफेर गर्दा लाग्ने शुल्क नलिने घोषणा गरेको छ ।

सोमबार विज्ञप्ति जारी गर्दै सडक सञ्जालको अवरोधका कारण काठमाडौंबाहिर रहेका, बेलैमा काठमाडौं आउन नसकेका यात्रुका लागि विशेष छूट नीति घोषणा गरिएको हिमालयले जनाएको  छ। 

यस एयरलाइन्सले आफ्ना यात्रुहरूको सहजता, सुरक्षा र सन्तुष्टिलाई ध्यानमा राख्दै यो व्यवस्था ल्याएको जनाएको छ ।

यो नीतिअन्तर्गत, त्रिभुवन अन्तर्राष्ट्रिय विमानस्थल (काठमाडौं) बाट हिमालय एयरलाइन्सका सबै अन्तर्राष्ट्रिय उडानका यात्रुहरूलाई एक पटक निःशुल्क मिति परिवर्तन गर्न सकिने व्यवस्था गरिएको छ । यात्रुहरूले यसका लागि कुनै पनि अतिरिक्त शुल्क तिर्नु पर्ने छैन ।

यस सुविधा अन्तर्गतका लागि योग्य यात्रुहरू ती हुन्, जसले हिमालय एयरलाइन्सको टिकट लिएर २०८२ असोज १८ देखि असोज २१ (अक्टोबर ४ देखि ७, २०२५) बीच यात्रा गर्न तय गरेका थिए ।