हेटौंडा — यो वर्ष कुलेखानी जलाशय भरिने सम्भावना न्यून हुँदै गएको छ । मनसुनको समय सकिन लागिसक्दा पनि जलाशयमा करिब १८ मिटर मात्र पानीको सतह बढेको छ । 

सुक्खायाममा कुलेखानी जलाशयको पानीको सतह १ हजार ४ सय ८५ मिटरसम्म झरेको थियो । वर्षायाम सुरु भएपछि कुलेखानी जलाशय इन्द्रसरोवरमा बिहीबार अपराह्नसम्म १ हजार ५ सय ३ दशमलब ८२ सेन्टिमिटर मात्र पानी संकलन भएको छ । 

कुलेखानी भरिन करिब २७ मिटर बाँकी छ । कुलेखानी जलाशय एक हजार ५ सय ३० मिटर पानी अट्ने क्षमतामा छ । गत वर्ष असोज ८ गते जलाशयको सतह १ हजार ५ सय २६ मिटर पुगेको थियो । ‘अहिलेको वर्षायाममा जलाधार क्षेत्रमा पानी नै परेको छैन,’ कुलेखानी  जलविद्युत आयोजना प्रथमका प्रमुख तारादत्त भट्टले भने, ‘असोज पहिलो साता बितिसक्यो, मौसमको छाँटकाट हेर्दा यो वर्ष जलाशय भरिन मुस्किलै छ, नर्मल पानी परेर हुँदैन, जलाधार क्षेत्रमा आरीघोप्टे वर्षा भए मात्र जलाशय भरिन्छ ।’ 

आयोजनाका अनुसार गत वर्ष साउन, भदौ र असोजमा जलाशयमा दैनिक ५० देखि ७५ सेन्टिमिटरसम्म पानीको सतह बढथ्यो, अहिले मुस्किलले २० सेन्टिमिटर पनि बढ्दैन । अहिले कुलेखानी जलविद्युत आयोजना ‘सटडाउन’गरिएको छ । पानीको सतह नबढेकाले सुक्खायाममा विद्युत् उत्पादनमा समस्या आउने मात्र होइन, मार्खु र चित्लाङमा आएका आन्तरिक एवं बाह्य पर्यटक पनि निराश भएर फर्कने गरेका छन् । 

'गत वर्ष असोज १० देखि १२ सम्म जसरी जलाधार क्षेत्रमा वर्षा भएको थियो, त्यसरी वर्षा भए मात्र जलशाय भरिन सक्छ नत्र अहिले परेको पानीले जलाशय भरिँदैन,' आयोजनाका एक वरिष्ठ प्राविधिकले भने । गत वर्ष असोज १० देखि १२ सम्म परेको पानीले जलाशय एक्कासि भरिएर कुलेखानीको ढोका खोल्दा तल्लो तटीय क्षेत्र सिस्नेरीको सडक, पुल र बस्तीमा क्षति पुगेको थियो  ।