काठमाडौँ — चालु आर्थिक वर्षको पहिलो दुई महिना (साउन र भदौ) मा ३ खर्ब ५ अर्ब १५ करोड रुपैयाँको वस्तु आयात भएको छ । यो रकम गत आर्थिक वर्षको सोही अवधिभन्दा १६.२३ प्रतिशतले बढी हो । आर्थिक वर्ष २०८१/८२ को पहिलो दुई महिनामा २ खर्ब ६२ अर्बर् ५४ करोडको आयात भएको थियो । 

भन्सार विभागले मंगलबार सार्वजनिक गरेको वैदेशिक व्यापारको तथ्यांकअनुसार आयात नभई नहुने वस्तुदेखि स्वदेशमै उत्पादन गर्न सकिने वस्तुको आयात बढेको हो । आसन्न चाडबाडले लत्तकपडालगायत वस्तुको पनि आयात बढेको छ । जसले गर्दा आयात र निर्यातको खाडल बढेको छ । गत साउन र भदौमा ४७ अर्ब ३१ करोड रुपैयाँको वस्तु निर्यात भएको छ । यो रकम गत आर्थिक वर्षको सोही अवधिको तुलनामा ८८.५७ प्रतिशतले बढी हो । आर्थिक वर्ष २०८१/८२ को साउन र भदौमा २५ अर्ब ९ करोड रुपैयाँको निर्यात भएको थियो । यस वर्ष भने आयातसँगै निर्यात रकम पनि बढेको हो ।

चालु आर्थिक वर्षको पहिलो महिना साउनमा १ खर्ब ४३ अर्ब ४ करोडको वस्तु आयात भएको थियो । २३ अर्ब ९३ करोड रुपैयाँको वस्तु निर्यात भएको थियो । भदौसम्म आइपुग्दा आयात सामान्य बढेको छ । निर्यातको हकमा भने उस्तै छ । विभागका अनुसार आयात हुने वस्तुमा पहिलो नम्बरमा सोयाबिन कच्चा पदार्थ छ । दुई महिनामा २१ अर्ब ६४ करोड ७७ लाख रुपैयाँको सोयाबिन कच्चा पदार्थ आयात भएको छ । 

तेस्रो मुलुकबाट आयात हुने सोयाबिन कच्चा पदार्थ नेपालमा प्रशोधन भएर भारत निर्यात गरिन्छ । निर्यातमा छुट र अग्रिम भुक्तानी सुविधाले व्यवसायीहरू सोयाबिन तेल स्वदेशमा बिक्रीभन्दा भारतमै निर्यात गर्छन् । सोयाबिनको कच्चा पदार्थ र तेलले समग्र आयातनिर्यातको व्यापार बढाएको छ । 

दोस्रोमा भने १४ अर्ब ९१ करोड रुपैयाँको डिजेल आयात भएको छ । १० अर्ब ५८ करोडको पेट्रोल, ९ अर्ब ४३ करोडको एलपी ग्यास, ८ अर्ब ८७ करोडको आइरन, ३ अर्ब १२ करोडको सुन, २ अर्ब ८५ करोडको हवाई इन्धन आयात भएको छ । स्वदेशमै उत्पादन हुन सक्ने २ अर्ब ७१ करोड रुपैयाँको मकै, २ अर्ब २३ करोड रुपैयाँको सनफ्लावर कच्चा पदार्थ, २ अर्ब १४ करोडको धान, २ अर्ब ३ करोड रुपैयाँको स्याउलगायत वस्तु आयात भएको छ । 

निर्यात हुने वस्तुमा सोयाबिन तेल नै अगाडि छ । चालु आर्थिक वर्षको दुई महिनामा २० अर्ब ४२ करोड रुपैयाँको सोयाबिन तेल निर्यात भएको छ । दोस्रोमा १ अर्ब ५८ करोडको कार्पेट, १ अर्ब ३८ करोडको सनफ्वार तेल, १ अर्ब ३१ करोडको पाम तेल, ८८ करोडको यार्न, ८५ करोडको अलैंची, ७७ करोडको जुसलगायत वस्तु निर्यात भएको छ ।