काठमाडौं– दसैं नजिकिँदै गर्दा सिन्धुपाल्चोकको तातोपानी र रसुवाको रसुवागढी नाका ठप्प छन् । असार २४ गते लेन्दे खोलामा आएको बाढीले नेपाल–चीन जोड्ने पक्की पुल बगाएसँगै यो नाका ठप्प बनेको हो । त्यस्तै अरनीको राजमार्ग अन्तर्गत कोदारी खण्डमा पहिरो गएसँगै तातोपानी नाका चल्न सकेको छैन ।

उक्त राजमार्ग अन्तर्गत नै पर्ने डाक्लाङमा पहिरो गएपछि थप समस्या भएको छ । यी दुबै नाका दसैं अघि सञ्चालनमा आउने सम्भावना न्यून रहेकै बेला मुस्ताङस्थित नेपाल–चीन जोड्ने कोरला नाकाबाट भने धमाधम सामान भित्रिरहेको छ । सबै पूर्वाधार तयार पारेर कोरला नाका सञ्चालनमा ल्याइएको मुस्ताङ भन्सार कार्यालयका भन्सार अधिकृत रमेश खड्काले बताए ।