काठमाडौँ — सेयर बजार लगातार उच्च अंकले ओरालो लाग्न थालेपछि सेयर बजारको आकार (कुल बजार पुँजीकरण) एकै दिन करिब ५२ अर्बले खुम्चिएको छ । साप्ताहिक कारोबारको पहिलो दिन आइतबार नेप्से परिसूचक ३१ अंकले घट्यो ।

सो दिन कारोबारमा आएकामध्ये २१ कम्पनीको सेयर मूल्य बढ्दा २२८ वटाको घट्यो । यसरी सेयर मूल्य बढ्ने कम्पनीको तुलनामा घट्ने कम्पनी धेरै भएपछि एकै दिन सेयर बजारको आकार ५२ अर्ब ९ करोड ४० लाख रुपैयाँले खुम्चिएको हो ।

नेप्सेका अनुसार गत बिहीबार ४६ अर्ब ४७ करोड रुपैयाँ रहेको कुल बजार पुँजीकरण आइतबार ४५ अर्ब ९५ करोड रुपैयाँ कायम भएको छ । कुल सूचीकृत सेयरलाई सोही दिनको सेयर मूल्यले गुणा गरेर कुल बजार पुँजीकरण गणना गरिन्छ । पुँजीकरण घट्नुको अर्थ सूचीकृत सेयरको बजार मूल्यमा कमी हुनु हो । यही आधारमा पुँजीकरण घट्दा लगानीकर्ताको सम्पत्तिको मूल्य घटेको रूपमा विश्लेषण गरिन्छ । 

अघिल्लो दिनको तुलनामा आइतबार १.१२ प्रतिशतले घटेपछि समग्र नेप्से २ हजार ७ सय ४९.८३ बिन्दुमा ओर्लेको छ । 

सो दिन ९७ हजार १ सय ७४ पटकको कारोबारमा १ करोड ४८ लाख ५ हजार ५ सय ६९ कित्ता सेयर किनबेच भए । उक्त किनबेचमा ६ अर्ब ६ करोड १८ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम घटेको हो । गत बिहीबार ८ अर्ब ९ करोड ५६ लाख रुपैयाँ बराबरको सेयर कारोबार भएको थियो । 

आइतबार कारोबारमा आएकामध्ये १३ उपसमूहमध्ये सबैको परिसूचक घटेपछि समग्र नेप्सेमा उच्च अंकको गिरावट भएको हो । परिसूचक धेरै घट्ने उपसमूहमा जीवन बिमा, निर्जीवन बिमा, विकास बैंकलगायत रहे । आइतबार उन्नति सहकार्य लघुवित्तको सेयर मूल्य ६.७७, आशा लघुवित्तको ४.१६, माछापुच्छ्रे डिबेञ्चर (८.५ प्रतिशत) को ३.९३, एनआईसी एसिया डिबेञ्चर (२०८५/२०८६) को ३.८० र नबिल ब्यालेन्स फन्ड– को सेयर मूल्य ३.३६ प्रतिशतले बढे । यसको अर्थ बजार घट्दा पनि यी कम्पनीका सेयरधनीको सम्पत्तिको मूल्य बढ्यो (नाफा कमाए) भन्ने हो ।