जुम्ला — जुम्लाका स्याउ किसानले ५० प्रतिशत अनुदानमा स्याउको कार्टुन पाएका छन् । प्रधानमन्त्री कृषि आधुनिकीकरण परियोजना, परियोजना कार्यन्वयन इकाइ जुम्लाले मंगलबारदेखि किसानलाई कार्टुन उपलब्ध गराउन थालेको हो । 

जुम्लाको स्याउ भारतीय र चीनको कार्टुनमा निर्यात भइरहेको बेला स्याउ सुपरजोनले अनुदानमा ११ हजार कार्टुन जुम्ला पुर्‍याएको हो । कार्यालय प्रमुख सन्तोषकुमार चौधरीले जुम्ली स्याउ लेखिएको कार्टुन किसानलाई दिइएको बताए । 

बाहृय कार्टुनमा स्याउ निर्यात गर्दा जुम्ली स्याउको पहिचान र गुणस्तरमा समस्या हुन सक्ने भन्दै चालु आर्थिक वर्षको बजेटबाटै स्याउका कार्टुन खरिद गरिएको हो । स्याउको प्याकेजिङ लेबलिङ तथा पोस्ट हार्भेष्ट क्षति न्यूनिकरण कार्यक्रमअन्तर्गत स्याउ कार्टुन उपलब्ध दिइएको हो । 

सूचना अधिकारी पदमराज कार्कीले ११ हजार कार्टुन जुम्ला आइपुगेको बताए । उनका अनुसार ११ जना किसानलाई ७ हजार ९ सय ४० कार्टुन बाँडिसकिएको छ । किसानको स्याउ सहजै रुपमा निर्यात गर्न यो कार्टुनले सजिलो बनाउनेछ । 

चार लाख ९५ हजार रुपैयाँ कार्यालय र ५० प्रतिशत किसान गरी कुल ९ लाख ९० हजार रुपैयाँमा कार्टुन जुम्ला आइपुगेको हो । कृषक समूह, सहकारी, कृषि उद्यमी तथा स्याउ व्यापारीलाई दिइएको छ । प्रतिकिसानले तीन सयदेखि एक हजार बढीसम्म कार्टुन लिएका छन् । कार्टुनमा १० देखि १२ केजीसम्म स्याउ अटाउनेछ ।