पर्सा — नाडा अटोमोबाइल्स एसोसिएसन अफ नेपालका अध्यक्ष करण चौधरीले सीमा नाकाबाट हुने चोरी पैठारीले अटोमोबाइल्स व्यवसाय प्रभावित भइरहेको बताएका छन् । नाडा अटोमोबाइल्स एसोसिएसन अफ मधेश प्रदेशको शुक्रबार वीरगन्जमा सम्पन्न तेस्रो साधारण सभा समारोहलाई सम्बोधन गर्दै चौधरीले तराई मधेशका जिल्लाका सुरक्षा प्रमुखको हातमा आफूहरूको व्यवसायको भविष्य रहेको बताए ।

‘खुल्ला सीमा हाम्रो व्यवसायमा चुनौती भएको छ । चोरी पैठारीले हाम्रो व्यवसाय पनि प्रभावित भइरहेको छ,’ उनले भने ।

सीमावर्ती जिल्लाका सुरक्षा निकायलगायत कतिपय सरकारी अधिकारी पनि आफ्नो सवारीसाधन मर्मत र पार्टपुर्जा खरिद गर्न भारतीय बजार जाने प्रवृत्ति रहेको पनि उनले बताए । अटोमोबाइल व्यवसाय अझै पनि बागमती प्रदेश पछि मधेश प्रदेशमै बढी सफल रहेको उनले बताए । नाडाको आकार ठुलो भइसकेको बताउँदै उनले केही वर्षयता नाडाले अन्तर्राष्ट्रिय छवि पनि निर्माण गरिसकेको दाबी गरे ।

समारोहलाई सम्बोधन गर्दै वीरगन्ज उद्योग वाणिज्य संघका अध्यक्ष हरि गौतमले नेपालको राजस्वमा सर्वाधिक योगदान अटोमोबाइल्स क्षेत्र रहेको र नेपालमा सबै प्रतिष्ठित घरानाको यो क्षेत्रमा आबद्धताले यसको महत्त्व झल्किने बताए । अटोमोबाइल्स क्षेत्रको विकास नभई मुलुकको अर्थतन्त्र नचल्ने पनि उनले बताए । नाडा मधेश प्रदेशका नवनिर्वाचित अध्यक्ष राहुल अग्रवालले आफू नेतृत्वको समितिले मधेश प्रदेशको पूर्वाधार यातायात प्रणालीमा सुधारका लागि सरकारी निकायसँग सहकार्य गर्ने बताए । उनले मधेशका राजमार्ग तथा सहायक मार्गहरूमा चार्जिङ स्टेशन निर्माण, सडक सुरक्षा चेतना वृद्धि, वृक्षारोपण जस्ता कार्यमा पनि योगदान गर्ने प्रतिबद्धता जनाए । मधेशका ८ जिल्लामै नाडाको संरचना स्थापना गर्ने योजना सुनाउँदै उनले स्थानीय स्तरमा अटोमोबाइल व्यवसायमा रहेका समस्यालाई समितिले सम्बोधन गर्ने बताए ।