काठमाडौँ — पछिल्लो तीन दिनयता सेयर कारोबार मापक नेप्से परिसूचक लगातार घटेको छ । गत बुधबार र बिहीबार क्रमशः ९.७० र ९.२२ अंकले घटेको नेप्से आइतबार १८.२ अंकले ओरालो लागेको हो । अघिल्लो दिनको तुलनामा ०.६५ प्रतिशतले घटेपछि समग्र नेप्से २ हजार ७ सय ३९.९५ बिन्दुमा ओर्लेर बन्द भएको हो । आइतबारको गिरावटसँगै तीन दिनदेखि नेप्से लगातार घटिरहेको छ ।

यद्यपि बजारमा उच्च अंकको गिरावट भने छैन । बजारको यो प्रवृत्तिलाई विश्लेषकहरूले लगानीकर्ताको आत्मविश्वास बढ्न नसकेका रूपमा विश्लेषण गरेका छन् । 

अहिले सेयर बजारका लागि नीति अनुकूल छन् । ब्याजदर न्यून छ । करिब डेढ वर्षदेखि बैंक तथा वित्तीय संस्थामा अधिक तरलताको अवस्था छ । तरलता व्यवस्थापनकै लागि राष्ट्र बैंकले साताको दुई दिन आइतबार र बुधबार नियमित रूपमा बजारबाट पैसा झिकिरहेको छ । बैंकहरू ऋणी खोज्दै हिँडेका छन् । यस्तो अवस्थामा सेयर बजार बढ्न नसक्नुलाई लगानीकर्ताको आत्मविश्वाससँग जोडेर विश्लेषण हुन थालेको छ । 

नीतिगत रूपमा हेर्दा वित्त नीति (बजेट) र मौद्रिक नीति दुवै सेयर बजार विकास र विस्तारकै पक्षमा देखिन्छन् । नयाँ गभर्नरमा विश्व पौडेल आएसँगै सेयर धितोमा प्रवाह हुने कर्जाको जोखिम भार घटाइएको छ भने व्यक्तिगत सेयर कर्जाको सीमा बढाइएको छ । यसरी नीतिगत अनुकूलताका बाबजुद सेयर बजार बढ्न नसक्नु र भएका लगानीकर्ता पनि सेयर बिक्री गरेर बाहिरिने प्रवृत्ति देखिएको एक धितोपत्र ब्रोकरले बताए । उनका अनुसार अहिले जस्तै सबैतिरबाट अनुकूल अवस्था सेयर बजारका लागि विरलै हुने गर्छ । तर पनि सेयर बजार बढ्न नसक्नु दुःखदायी भएको उनको भनाइ छ । 

आइतबार कारोबारमा आएका मध्ये ४१ कम्पनीको सेयर मूल्य बढ्दा २ सय ८ वटा कम्पनीको घट्यो । यसरी सेयर मूल्य बढ्नेभन्दा घट्ने कम्पनी बढी भएपछि समग्र नेप्सेमा १८ अंकले घटेको हो । उक्त दिन ५८ हजार १ सय ५ पटकको कारोबारमा १ करोड ४० लाख ९ हजार ७ सय ८ कित्ता सेयर किनबेच भए । उक्त किनबेचमा ६ अर्ब ५४ करोड ८६ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम बढेको हो । गत बिहीबार नेप्सेमा ५ अर्ब २ करोड रुपैयाँ बराबरको सेयर कारोबार भएको थियो ।