काठमाडौँ — अरनिको राजमार्गअन्तर्गत कोदारी खण्डमा पहिरो खसेर ठप्प बनेको तातोपानी नाका १८ दिनपछि सञ्चालनमा आएको छ । उक्त खण्डमा करिब २ सय मिटर सडकमा पहिरो खसेर आवागमनमा समस्या भएको थियो । गत साउन १७ मा आएको पहिरोले सडक बगेको थियो । जसले गर्दा तातोपानी नाकातर्फ करिब ७ सय कन्टेनर सडकमै रोकिएका थिए ।

बुधबार साँझबाट सडक सञ्चालनमा आएसँगै पहिलो दिन साना सवारी र दोस्रो दिन आलोपालो गरेर कन्टेनर पास गराइएको सिन्धुपाल्चोकका प्रमुख जिल्ला अधिकारी बन्धुप्रसाद बास्तोलाले बताए ।

‘अहिले सडक एकतर्फी खुलाइएको छ,’ उनले भने, ‘पहिरोभन्दा माथिसम्म प्लास्टिकले ढाकिएको छ । त्यसैले तत्काललाई केही समस्या छैन, ठूलो पानी परे पहिरोको जोखिम भने छ ।’ धेरै मिहिनेत गरेर सडक खुलाइएको उनले सुनाए । ‘अहिले सामान लिएर आएका कन्टेनर तातोपानी नाकातर्फ रोकिएका छन्,’ उनले भने, ‘चीनतर्फ सात सय कन्टेनर रोकिएको जानकारी पाएका छौं ।’ 

अहिले नेपालबाट चीनतर्फ जाने र उताबाट नेपाल भित्रने कन्टेनरलाई आलोपालो गर्दै सडक पास गराइएको बास्तोलाले जनाए । ‘सडक निकै अप्ठ्यारो छ, एउटै कन्टेनरलाई पार गर्न निकै समय लाग्छ, जसले गर्दा एक दिनमा ६० वटा कन्टेनर आउने र त्यति नै संख्यामा चीनतर्फ पठाउने गरिएको छ,’ उनले भने । दुई दिन राम्रोसँग घाम लागे सडक सञ्चालनमा धेरै सहज हुने उनको भनाइ छ । यस नाकाबाट फलफूल, लत्ताकपडा, सवारीसाधनलगायत सामान भित्रिने गरेका छन् । 

यता स्याफ्रुबेंसी–रसुवागढी सडक भने गत साउन १४ देखि ठप्प छ । असार २४ मा आएको बाढीका कारण १२ दिनसम्म सडक ठप्प थियो । १३ दिनपछि साउन ४ बाट एकतर्फी सञ्चालनमा आएको १० दिनमै पुनः पहिरो गएपछि सडक बन्द छ । अहिले एकातिर सडक बनाइरहेको र तलबाट भोटेकोशीले खोतल्ने गरिरहेका कारण समस्या भइरहेको सडक विभागले जनाएको छ ।

यो सडक सञ्चालनमा ल्याउन अझै एक साता लाग्ने संघीय सडक सुपरिवेक्षण तथा अनुगमन कार्यालयका प्रमुख शुभराज न्यौपानेले बताए । विभिन्न खण्डमा गरेर ५ स्थानमा ६ सय मिटर सडक पूर्ण रुपमा क्षति भएको छ । उत्तरगया गाउँपालिकाको खाल्टेमा सय मिटर सडक त्रिशूली नदीले कटान गरेको थियो । बिहीबार साँझबाट उक्त सडक खुलाइसकिएको न्यौपानेको भनाइ छ । ‘स्याफ्रुबेंसी–रसुवागढी सडकखण्डका दुई ठाउँमा अझै समस्या छ,’ उनले भने, ‘ती ठाउँमा चट्टान काटेर सडक खुलाइँदै छ ।’ 

गत असार २४ मा ल्हेन्देखोलामा आएको बाढीले नाका जोड्ने पुल बगाएपछि तयारी सामान आउन पाएका छैनन्, जसले गर्दा अहिले रसुवागढी भन्सार नाकासमेत ठप्प बनेको छ । अप्ठ्यारो खण्ड भएकाले सडक खुलाउन समस्या भएको भौतिक पूर्वाधार तथा यातायात मन्त्रालयका सचिव केशवकुमार शर्माले जनाए । ‘अहिले सडक खुलाउने प्रयास भइरहेको छ,’ उनले भने, ‘तर नाका जोड्ने बेलिब्रिज बन्नुअघि नै सडक सञ्चालनमा आउँछ ।’