यो साता सेयर बजारमा खासै उत्साह देखिएन, सेयर मूल्य बढ्नेभन्दा घट्ने कम्पनी बढी भएपछि समग्र नेप्से झन्डै दोहोरो अंकले घट्यो
What you should know
काठमाडौँ — साप्ताहिक कारोबारको अन्तिम दिन बिहीबार सेयर कारोबार मापक नेप्से परिसूचक ९.२२ अंकले घटेको छ । अघिल्लो दिनको तुलनामा ०.३३ प्रतिशतले घटेपछि समग्र नेप्से २ हजार ७ सय ५७.९७ बिन्दुमा ओर्लेर बन्द भएको छ । यो साता सेयर बजारमा खासै उत्साह देखिएन ।
पहिलो दिन करिब २७ अंकले घटेको नेप्से सोमबार ९.१६ र मंगलबार ६.५१ अंकले बढेर बन्द भयो । तर सोमबार र मंगलबारको वृद्धि बुधबारसम्म पनि टिकेन । यही कारण बुधबार नेप्से ९.७० र बिहीबार ९.२२ अंकले घटेर बन्द भएको छ । यस दिन कारोबारमा आएकामध्ये ५३ कम्पनीको सेयर मूल्य बढ्दा १९७ वटा कम्पनीको घट्यो । यसरी सेयर मूल्य बढ्ने भन्दा घट्ने कम्पनी बढी भएपछि समग्र नेप्से झन्डै दोहोरो अंकले घटेको हो ।
बिहीबार ५६ हजार ८ सय २४ पटकको कारोबारमा १ करोड ६८ लाख ५५ हजार ९ सय ६ कित्ता सेयर किनबेच भए । उक्त किनबेचमा ५ अर्ब २ करोड रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम घटेको हो । बुधबार ५ अर्ब २० करोड रुपैयाँ बराबरको सेयर कारोबार भएको थियो । यस दिन कारोबारमा आएका १३ उपसमूहमध्ये निर्जीवन बिमाबाहेक सबैको परिसूचक घटेपछि समग्र नेप्सेमा झन्डै दोहोरो अंकले गिरावट भएको हो । निर्जीवन बिमा उपसमूहको परिसूचक ०.१४ प्रतिशतले सकारात्मक छ ।
घटेको बजारमा पनि बिहीबार विकास हाइड्रोपावरको सेयर मूल्य ९.९९ प्रतिशत, सामुदायिक लघुवित्तको ५.३७, मुक्तिनाथ ऋणपत्र ३.३५, रसुवागढी हाइड्रोपावरको २.८६ र सानिमा ग्रोथ फन्डको सेयर मूल्य २.७५ प्रतिशतले बढेको छ । बिहीबार सबैभन्दा धेरै सेयर मूल्य घट्ने मुख्य पाँच कम्पनीमा क्रमशः जनउत्थान सामुदायिक लघुवित्त, सयपत्री हाइड्रोपावर, रिलायवल समृद्धि योजना, नबिल ऋणपत्र २०८२ र पञ्चकन्या माई हाइड्रोपावर छन् ।
कारोबार रकमका आधारमा हिमालयन रि–इन्स्योरेन्स, नेपाल रि–इन्स्योरेन्स, बलेफी हाइड्रोपावर, बुटवल पावर कम्पनी र हिमालयन डिस्टिलरी क्रमशः सबैभन्दा अघि छन् । पछिल्ला महिनामा सेयर धितोमा कर्जा बढिरहे पनि त्यसको सकारात्मक असर सेयर बजारमा देखिएको छैन । गत आर्थिक वर्षको ११ महिनामा मात्र बैंक तथा वित्तीय संस्थाले थप ३८ अर्ब ५७ करोड रुपैयाँ सेयर कर्जा प्रवाह गरेका छन् । अघिल्लो आर्थिक वर्षको ११ महिनाको तुलनामा गत वर्षको सोही अवधिमा प्रवाह भएको सेयर कर्जा ४२.८ प्रतिशतले बढी हो ।
अघिल्लो आर्थिक वर्षको ११ महिनामा सेयर कर्जाको वृद्धिदर १४.२ प्रतिशतले बढेको थियो । गत आर्थिक वर्षको सुरुदेखि नै सेयर कर्जा बढिरहेको छ । तर सेयर कर्जाको अनुपातमा सेयर बजार बढ्न सकेको छैन । सेयर कर्जाका नाममा जति पैसा आएको छ, त्योभन्दा धेरै पैसा सेयर बजारमै लगानी गर्नुपर्ने बाध्यता छैन । यसकारण सेयर धितोमा प्रवाह भएको कर्जा बढ्दैमा त्यो सबै पुँजी बजारमै लगानी नभएकाले सेयर बजार अपेक्षित रूपमा बढ्न नसकेको जानकार बताउँछन् ।
