काभ्रे — भूमि व्यवस्था सहकारी तथा गरिबी निवारणमन्त्री बलराम अधिकारीले जनताको समस्या समाधान गर्न सरकार केन्द्रित हुनुपर्ने बताएका छन् । 

काभ्रेको भुम्लु गाउँपालिकामा मंगलबार आयोजित गाउँपालिकाको वडा नं ७ र ८ को जग्गा धनी प्रमाणपत्र वितरण कार्यक्रमलाई सम्बोधन गर्दै सरकार जनताको समस्या समाधान गर्न केन्द्रित हुनुपर्ने बताएका हुन् । उनले भने, ‘लालपुर्जाविहीन भएका नागरिकहरुको समस्याप्रति सरकारको चासो रहँदै आएको थियो, यसलाई विषयलाई प्राथमिकतामा पनि राखिएको थियो, जसअनुरुप यहाँका नागरिकलाई लालपुर्जा प्रदान गरिएको छ ।’ उनका अनुसार, मुलुकलाई सुखी र समृद्ध बनाउने सरकारको अभियान रहेको छ । 'सोही अभियानअनुरुप नै यहाँका नागरिकको समस्या समाधान गर्न हामी केन्द्रित रहेका थियौं,' उनले भने । 

‘जनताले दिएको मत र विश्वासले हामी यहाँ छौं,’ उनले भने, ‘जसअनुसार नै  नेपालमा संविधान पनि बनेको छ, जसको कार्यान्वयनको क्रममा रहेका छौं, कार्यान्वयन गर्दै, केही संशोधन गर्नुपर्ने देखिएको छ भने केही नयाँ कानुन बनाउनुपर्ने अवस्था पनि रहेको छ ।’ 

संविधानमा उल्लेख भएअनुसार नै तीन तहको सरकारको सहकार्य र समन्वय अपरिहार्य रहेको उनको भनाइ छ । ५० वर्षदेखि जनताको समस्या समाधान गर्न पनि तीन तहकै सरकार केन्द्रित भएर आज यहाँका नागरिकलाई लालपुर्जा वितरण गर्न सकिएको उनले बताए ।