भैरहवा — मुलुकका सीमावर्ती सहरमा मात्र भारतीय पर्यटकको आकर्षण छैन, सीमानाका भएर आउने भारतीय नागरिक रूपन्देही हुँदै मुलुकका प्रमुख पर्यटकीय गन्तव्यमा पुगिरहेका छन् । भैरहवास्थित बेलहिया नाका हुँदै भित्रिने भारतीयको पहिलो रोजाइ पोखरा रहेको पर्यटन व्यवसायी बताउँछन् । त्यसपछि पशुपतिनाथ दर्शनका लागि प्रायः पर्यटक काठमाडौं पुग्ने गरेका छन् । 

वन्यजन्तु सफारीका लागि चितवन पुग्ने भारतीयको संख्या पनि उल्लेख्य छ । लुम्बिनीस्थित अर्घाखाँचीको सुपादेउराली र प्यूठानको स्वर्गद्वारीमा पनि भारतीयको आकर्षण देखिन्छ । गत वर्ष बेलहिया नाका हुँदै दिनहुँ ५ हजार भारतीय नागरिक भित्रिएको भन्सार कार्यालयको तथ्यांक छ । दिनको १ हजार ३ सय हाराहारी सवारीसाधन भित्रिएको कार्यालयले जनाएको छ । 

आर्थिक वर्ष २०८१/८२ मा बेलहियाबाट ४ लाख ७३ हजार ५ सय ३८ साना–ठूला गाडी मुलुक भित्रिएको भैरहवा भन्सारले बताएको छ । तीमध्ये सुविधा (नजिकको बजारसम्मका लागि शुल्क तिर्न नपर्ने) मा भित्रिने कार, जिप, मोटरसाइकल र बस ३ लाख ५१ हजार ७ सय ४८ वटा रहेको भैरहवा भन्सार प्रमुख रामप्रसाद रेग्मीको भनाइ छ । यसमा २ लाख २४ हजार ४ सय ८८ मोटरसाइकल, १ लाख २७ हजार २ सय ६० कार, जिप र भ्यान छन् । भन्सारका अनुसार दिनको ९ सयभन्दा बढी गाडी सुविधामा भित्रिने गरेको उनले जनाए । 

गत वर्ष भन्सार शुल्क तिरेर १ लाख २१ हजार ७ सय ९० वटा सवारी नेपाल आएका थिए । यसरी आउनेमा १२ हजार ५ सय ६३ बस तथा मिनी बस, ७२ हजार ४ सय ४३ कार, जिप र भ्यान र ३६ हजार ८ सय ११ मोटरसाइकल थिए । भन्सार शुल्क तिरेर भित्रिएका गाडीमा सवार पर्यटक पोखरा, काठमाडौं र चितवनसम्म जाने गरेको भन्सार प्रमुख रेग्मी बताउँछन् ।

दिनको ३ सयभन्दा बढी विभिन्न भारतीय सवारी भन्सार शुल्क तिरेर नेपाल आएको देखिन्छ । बस तथा मिनी बस, कार, जिप र भ्यानले मुलुक प्रवेश गरेबापत ६ सय र मोटरसाइकलको दैनिक २ सय रुपैयाँ भन्सार तिनुपर्छ । एउटा गाडीलाई एक वर्षमा बढीमा ३० दिनका लागि भन्सार सुविधा उपलब्ध गराइने रेग्मीले जनाए । 

रूपन्देहीस्थित पर्यटन व्यवसायीका अनुसार बेलहिया हुँदै दिनको कम्तीमा ५ हजार भारतीय नागरिक मुलुकका विभिन्न गन्तव्य घुम्न आउने गरेका छन् । आफ्नै गाडीबिना पनि मुलुक प्रवेश गर्ने भारतीयको संख्या दिनको ४/५ सय हाराहारी रहेको पर्यटन व्यवसायीको भनाइ छ । भन्सार शुल्क तिरेर प्रवेश गर्ने गाडीमा सवार पर्यटकले विभिन्न गन्तव्यमा ४–५ दिन बिताउने गरेको नेपाल एसोसिएसन अफ टुर एन्ड ट्राभल एजेन्ट्स (नाट्टा) लुम्बिनी प्रदेशका पूर्वअध्यक्ष सागर अधिकारीले बताए । ‘यसरी आउनेमध्ये ५० प्रतिशत पर्यटक पोखरा जाने गरेका छन्,’ उनले भने, ‘४० प्रतिशत काठमाडौं र १० प्रतिशत जति चितवन जाने गरेका छन् ।’

पोखरा गएका मध्ये ५० प्रतिशत भारतीय नागरिक मुक्तिनाथ पुग्ने गरेको अधिकारीको भनाइ छ । ‘गाडी, चालक र पर्यटक सबै भारतीय नै हुन्छन्,’ उनले भने, ‘धेरै संख्या भित्रिए पनि नेपाली पर्यटन व्यवसायीले पर्याप्त लाभ पाउँदैनन् ।’ भारतीय गाडी चालकले सहज र सजिलै पुग्न सकिने स्थान घुमाएर फर्काउने गरेका कारण पर्यटकलाई नेपालमा केही रहनेछ भन्ने लाग्ने गरेको उनले जनाए । ‘नेपाली गाडी र पथप्रदर्शक भएको खण्डमा साइड सिनहरू प्रशस्त देखाउँछन्,’ उनले भने, ‘भारतीयलाई त्यसमा चासो नहुने भएकाले नेपाली गन्तव्यका विशेषताको प्रचार हुन सकेको छैन ।’