काठमाडौँ — पछिल्ला तीन कारोबार दिनमा नेप्से परिसूचक ६४.६२ अंकले घटेको छ । सार्वजनिक बिदा भएकाले आइतबार सेयर बजार बन्द रह्यो । सोमबारदेखि खुलेको बजार लगातार तीन दिन घट्दा नेप्से २ हजार ७ सय ८५ अंकमा ओर्लेर बन्द भएको छ । 

गत सोमबार नेप्से २ हजार ८ सय २२ अंकमा थियो । केही दिनयता बैंक तथा वित्तीय संस्थाले चौथो त्रैमासको वित्तीय प्रतिवेदन सार्वजनिक गरिरहेका छन् । प्रायः बैंकको वित्तीय अवस्था निकै राम्रो छ । तर सेयर बजार भने लगातार घटिरहेको छ । अघिल्लो साता करिब ३ हजार माथि पुगेर बन्द भएको नेप्से लगातार घटेर अहिलेको अवस्थामा ओर्लेको हो । 

सेयर कारोबार मापक नेप्से परिसूचक बुधबार १०.५० अकंले घटेको छ । अघिल्लो दिनको तुलनामा ०.३७ अंकले घटेपछि नेप्से दोहोरो अंकले घटेको हो । यससँगै समग्र नेप्से २ हजार ७ सय ८५.७४ अंकमा ओर्लेर बन्द भएको छ । यस दिन कारोबारमा आएकामध्ये ८९ कम्पनीको सेयर मूल्य बढ्दा १५९ वटाको घट्यो । एउटा कम्पनीको सेयर मूल्य स्थिर रह्यो । 

बुधबार ७० हजार ९९ पटकको कारोबारमा १ करोड ५८ लाख ४७ हजार ८ सय ७३ कित्ता सेयर किनबेच भए । ती किनबेचमा ६ अर्ब १६ करोड १८ लाख रुपैयाँ बराबरको सेयर कारोबार भयो । अघिल्लो दिनको तुलनामा कारोबार रकम घटेको हो । मंगलबार ७८ हजार २ सय २६ पटकको कारोबारमा १ करोड ७६ लाख ७१ हजार ६ सय ७५ कित्ता सेयर किनबेच भएका थिए । ती किनबेचमा ६ अर्ब ९१ करोड ८९ लाख रुपैयाँ बराबरको सेयर कारोबार भएको थियो ।

सो दिन कारोबारमा आएका १३ उपसमूहमध्ये बैंकिङ, होटल तथा पर्यटन, जलविद्युत्, लगानी, जीवन बिमा, उत्पादन तथा प्रशोधन, लघुवित्त, निर्जीवन बिमा र व्यापार उपसमूहको परिसूचक घटे । बाँकी उपसमूहको परिसूचक बढे पनि वृद्धिदर न्यून हुँदा समग्र नेप्से दोहोरो अंकले घटेको हो ।