काठमाडौँ — सेयर कारोबार मापक नेप्से परिसूचक मंगलबार २६.२२ अंकले घटेको छ । अघिल्लो दिन ३१.५० अंकले घटेको नेप्से मंगलबार पनि दोहोरो अंकले घटेको हो । सोमबारको तुलनामा ०.९२ प्रतिशतले घटेपछि मंगलबार समग्र नेप्से २ हजार ७ सय ९६.२४ अंकमा ओर्लिएको छ ।

उक्त दिन कारोबारमा आएकामध्ये २४ कम्पनीको सेयर मूल्य बढ्दा २२५ वटाको घट्यो । एक कम्पनीको मूल्य स्थिर रह्यो । 

मंगलबार ७८ हजार २ सय २६ पटकको कारोबारमा १ करोड ७६ लाख ७१ हजार ६ सय ७५ कित्ता सेयर किनबेच भए । ती किनबेचमा ६ अर्ब ९१ करोड ८९ लाख रुपैयाँ बराबरको सेयर कारोबार भयो । अघिल्लो दिनको तुलनामा कारोबार रकम घटेको हो । सोमबार १० अर्ब २१ करोड रुपैयाँ बराबरको सेयर कारोबार भएको थियो ।

मंगलबार कारोबारमा आएका १३ उपसमूहमध्ये होटल तथा पर्यटनबाहेक सबैको परिसूचक घटेको छ । होटल तथा पर्यटन उपसमूहको परिसूचक ९१.२३ अंकले बढेको छ । जीवन बिमा १४१.२७, निर्जीवन बिमा १०२.८८, लघुवित्त ७९.६४, उत्पादन तथा प्रशोधन ७६.८३, विकास बैंक ४४.६४, बैंकिङ १३.९६, व्यापार ३६.७५ अंकले घटेका छन् ।