काठमाडौँ — पछिल्लो समय नेपाली अचारको निर्यात बढ्दो क्रममा छ । भन्सार विभागको तथ्यांकअनुसार बर्सेनि अचारको निर्यात वृद्धि हुँदै गएको छ । आर्थिक वर्ष २०८१/०८२ मा मात्र १८ करोड २६ लाख ४६ हजार रुपैयाँ बराबरको अचार विदेश निर्यात गरिएको छ । सोही अवधिमा ९ करोड २१ लाख ६१ हजार रुपैयाँको अचार आयात गरिएको पनि विभागले जनाएको छ ।

गत वर्ष नेपालले चीन, भारत, कोरिया, युएई र नामिबियाबाट अचार आयात गरेको थियो । सबैभन्दा बढी अचार चीनबाट ४ करोड ७१ लाख २८ हजार, त्यसपछि भारतबाट ४ करोड ४९ लाख २८ हजार रुपैयाँको आयात गरिएको छ । कोरियाबाट ७२ हजार, युएईबाट २७ हजार र नामिबियाबाट ५ हजार रुपैयाँ बराबरको अचार आयात भएको छ ।

आर्थिक वर्ष २०७७/०७८ देखि मात्रै भन्सार विभागले अचार आयात र निर्यातको तथ्यांक राख्न थालेको हो । कोरोना महामारीपछि नेपालमा अचार उत्पादन उल्लेख्य रूपमा बढेको छ । स्वदेशमै उत्पादित विभिन्न ब्रान्डका अचार विशेषगरी तेस्रो मुलुकमा बसोबास गर्ने नेपालीहरूबीच लोकप्रिय बन्दै गएका छन् । यसैका कारण नेपाली अचारको माग विदेशमा बढेको हो ।

गत आर्थिक वर्षमा नेपालबाट अष्ट्रेलिया, इटाली, युएई, कोरिया, बेल्जियम, बेलायत, जापान, क्यानडा, मलेसिया, डेनमार्क, माल्टा र भारतमा अचार निर्यात गरिएको छ ।

सबैभन्दा धेरै अचार अष्ट्रेलियामा ४ करोड ११ लाख १७ हजार रुपैयाँ बराबर निर्यात गरिएको छ । त्यसपछि इटालीमा ३ करोड ९४ लाख ४६ हजार, युएईमा ३ करोड ६५ लाख ६४ हजार, कोरियामा २ करोड ५० लाख ९१ हजार, बेल्जियममा १ करोड ३५ लाख ४६ हजार र बेलायतमा ८३ लाख ६६ हजार रुपैयाँको अचार निर्यात भएको छ ।

यस्तै, जापानमा ७४ लाख ११ हजार, क्यानडामा ५१ लाख ८६ हजार, मलेसियामा ३१ लाख २६ हजार, डेनमार्कमा २० लाख २१ हजार र माल्टामा ७ लाख ७३ हजार रुपैयाँको अचार निर्यात भएको छ । भारतमा भने अघिल्लो वर्ष एक किलो अचार मात्र निर्यात गरिएको तथ्यांक छ, तर त्यसको मूल्य उल्लेख गरिएको छैन । वर्तमान समयमा ‘आमाको अचार’, ‘शान्ताको अचार’ लगायत ब्रान्डहरू लोकप्रिय भइरहेका छन् ।