काठमाडौँ — सेयर कारोबार मापक नेप्से परिसूचक सोमबार २१.७६ अंकले बढेर २ हजार ८ सय ९२.७२ अंकमा उक्लिएको छ । सोमबार नेप्से पछिल्लो ११ महिनायताकै उच्च बिन्दुमा पुगेको छ । यसअघि २०८१ भदौ ९ मा नेप्से २ हजार ८ सय ९४ बिन्दुमा थियो ।

त्यसयता २०८१ फागुन १८ मा २ हजार ८ सय ९० मा पुगे पनि त्यसमाथि जान सकेको थिएन । आइतबारको तुलनामा सोमबार ०.७५ प्रतिशतले बढेको हो । उक्त दिन कारोबारमा आएकामध्ये १५३ कम्पनीको सेयर मूल्य बढ्दा ९६ वटा कम्पनीको घट्यो । कुल १ लाख ३८ हजार ८ सय २८ पटकको कारोबारमा ३ करोड ५६ लाख ४९ हजार २ सय ११ कित्ता सेयर किनबेच भए । ती किनबेचबाट १६ अर्ब ३२ करोड ७१ लाख रुपैयाँ बराबरको सेयर कारोबार भएको छ । अघिल्लो दिनको तुलनामा कारोबार रकम घटेको हो ।

आइतबार नेप्से सामान्य सकारात्मक रहे पनि साढे २१ अर्बको सेयर कारोबार भएको थियो । सो दिन कारोबारमा आएकामध्ये १३ वटै उपसमूहको परिसूचक बढेपछि समग्र नेप्सेको वृद्धिमा टेवा पुगेको हो । सबैभन्दा बढी निर्जीवन बिमा १६८.१६ अंकले बढ्यो । लघुवित्त १०३.१०, विकास बैंक ८६.१२, अन्य ४७.१९, होटल तथा पर्यटन २१.७९ अंकले बढे । 

नेप्से बढ्दा सेयर बजारको आकार (कुल बजार पुँजीकरण) मा ३६ अर्ब ३२ करोड ५५ लाख रुपैयाँले वृद्धि भएको छ  । आइतबार ४७ खर्ब ९० अर्ब ६७ करोड ३० लाख रुपैयाँ रहेको कुल बजार पुँजीकरण सोमबार ४८ खर्ब २६ अर्ब ९९ करोड ८६ लाख कायम भएको छ । कुल सूचीकृत सेयर संख्यालाई सोही दिनको सेयर मूल्यले गुणा गरेर कुल बजार पुँजीकरण गणना गरिन्छ । बजारको आकारमा नयाँ रेकर्ड कायम भएको छ । यसअघि २०८१ फागुन ३ मा सेयर बजारको आकार ४७ खर्ब ९९ अर्ब रुपैयाँमा पुगेको थियो । सोमबार ४८ खर्ब २६ अर्ब ९९ करोड ८६ लाख रुपैयाँ कायम भएको छ ।