काठमाडौँ — साता सेयर कारोबार मापक नेप्से परिसूचक १३८.८३ अंकले बढेको छ । कुल ५ कारोबार दिनमा सोमबार मात्रै नेप्से परिसूचक ३५.०९ अंकले घट्यो । अघिल्लो शुक्रबार मौद्रिक नीति सार्वजनिक भएपछि आइतबार सेयर बजारमा ठूलो उत्साह आउने अपेक्षा गरिएको थियो ।

 तर मौद्रिक नीति सार्वजनिक भएपछिको पहिलो कारोबार दिन २९ अंकले मात्रै नेप्से बढ्यो । सोमबार नेप्से घट्यो । जानकारहरूले त्यसलाई क्लोजिङ इफेक्ट भनेर विश्लेषण गरे । तर, मंगलबारदेखि भने बजार लगातार उकालो लाग्यो । जसअनुसार मंगलबार नेप्से ३४.४६, बुधबार ३४.६१ र बिहीबार ७५.८४ अंकले बढ्यो ।

यससँगै नेप्से ५.०८ प्रतिशतले बढेर नेप्से २ हजार ८ सय ७०.६३ बिन्दुमा उक्लिएको छ । यो साता कारोबारमा आएका मध्ये २ सय ३२ कम्पनीको सेयर मूल्य बढेपछि नेप्सेको उच्च वृद्धि सम्भव भएको हो । यद्यपि सातामा १६ कम्पनीको सेयर मूल्य भने घटेको छ  ।

यो साताको अन्तिम कारोबार दिन पछिल्ला ११ महिनायताकै उच्च कारोबार भएको नेप्सेले जनाएको छ । बिहीबार १६ अर्ब ५९ करोड रुपैयाँको सेयर कारोबार भएको थियो । यो साता ५७ अर्ब ६८ करोड रुपैयाँको सेयर कारोबार भएको एनपी स्टक्सले जनाएको छ । एनपी स्टक्सका अनुसार यो साता ११ करोड ७९ लाख कित्ता सेयर किनबेच भएको छ ।

लचिलो मौद्रिक नीति आएसँगै सेयर बजारमा सकारात्मक प्रभाव परेको र अपेक्षित रूपमा बजार बढेको स्टक ब्रोकर एसोसिएसनका पूर्वअध्यक्ष धर्मराज सापकोटा बताउँछन् । ‘मौद्रिक नीतिपछि अपेक्षित रूपमै बजार बढेको छ,’ उनले भने, ‘बिहीबारको जस्तो एकै दिन ७५ अंकले वृद्धि हुन भएन । उत्ताउलो भएर बजार बढ्दा दिगो नहुन सक्छ । बजार प्राकृतिक रूपमा बढ्नुपर्छ ।’

पछिल्ला दुई वर्षमा मुलुकको अर्थतन्त्रका सूचक नकारात्मकबाट सकारात्मक हुँदै गए पनि बजारले अपेक्षा गरेअनुसार लचिलो नीति आउन नसकेको उनले सुनाए । अहिले बजारले अपेक्षा गरेअनुसार लचिलो मौद्रिक नीति आएकाले लगानीकर्ताको ‘कन्फिडेन्स’ बढाएको सापकोटाले बताए । 

यो साता सबै उपसमूह बढे । तुलनात्मक रूपमा लघुवित्त, विकास बैंक, फाइनान्स, वाणिज्य बैंक, जलविद्युत्लगायतमा लगानीकर्ताको आकर्षण रह्यो । लघुवित्त ८.१०, विकास बैंक ७.१०, फाइनान्स ६.२०, वाणिज्य बैंक ६.१३, जलविद्युत् ५.४४ प्रतिशतले बढ्यो । व्यापार सबैभन्दा कम १.५२ प्रतिशतले बढ्यो ।

यो साता थ्री स्टार हाइड्रोपावरको २१.९२, सम्पदा लघुवित्तको १६.१४, मितेरी विकास बैंकको १५.१८ र बुटवल पावरको १४.३९ प्रतिशतले सेयर मूल्य बढ्यो । एनआईसी एसिया बैंकको १३.६०, खानीखोला हाइड्रोपावरको १२.५७, इन्फिनिटी लघुवित्तको १२.०८, स्वरोजगार लघुवित्तको १२.०५, फरवार्ड कम्युनिटी लघुवित्तको १२.०३ र साहस ऊर्जाको १२ प्रतिशतले सेयर मूल्य बढेको एनपी स्टक्सले जनाएको छ । 

नेप्से बढ्दा सेयर बजारको आकार (कुल बजार पुँजीकरण) मा २ खर्ब ३१ अर्ब ८० करोड ३१ लाख रुपैयाँले वृद्धि भएको छ । अघिल्लो बिहीबार ४५ खर्ब ५१ अर्ब ५७ करोड २८ लाख रुपैयाँ रहेको कुल बजार पुँजीकरण बिहीबार ४७ खर्ब ८३ अर्ब ३७ करोड ६० लाख रुपैयाँ कायम भएको छ ।

कुल सूचीकृत सेयरलाई सोही दिनको सेयर मूल्यले गुणा गरेर कुल बजार पुँजीकरण गणना गरिन्छ । पुँजीकरण बढ्नुको अर्थ सूचीकृत सेयरको बजार मूल्य बढी हुनु हो । यही आधारमा पुँजीकरण बढ्दा लगानीकर्ताको सम्पत्तिको मूल्य बढेका रूपमा विश्लेषण गरिन्छ ।

यो साता जलविद्युत् र लघुवित्तका लगानीकर्ताले आफ्नो सम्पत्तिको मूल्य गुमाए । भगवती हाइड्रोपावरको १०.१२, वरुण हाइड्रोपावरको ५.०८, हिमालयन हाइड्रोपावरको ४.३, सप्तकोशी विकास बैंकको ३.८२ र राप्ती हाइड्रो एन्ड जनरल कन्स्ट्रक्सनको सेयर मूल्य ३.०६ प्रतिशतले घटेको छ । सामुदायिक लघुवित्तको २.०३, न्यादी हाइड्रोपावरको १.९८, नारायणी विकास बैंकको १.९२, आत्मनिर्भर लघुवित्तको १.७२ र मान्डु हाइड्रोपावरको १.६८ प्रतिशत सेयर मूल्य घट्यो । 

जसले यो साता कमाए

थ्री स्टार हाइड्रोपावर : २१.९२ प्रतिशत 

सम्पदा लघुवित्त : १६.१४ प्रतिशत 

मितेरी विकास बैंक : १५.१८ प्रतिशत 

बुटवल पावर : १४.३९ प्रतिशत 

एनआईसी एसिया बैंक : १३.६० प्रतिशत 

खानीखोला हाइड्रोपावर : १२.५७ प्रतिशत 

इन्फिनिटी लघुवित्त : १२.०८ प्रतिशत 

स्वरोजगार लघुवित्त : १२.०५ प्रतिशत