सेयर मूल्य बढ्ने कम्पनीमध्ये बैंकिङ उपसमूहका कम्पनी धेरै, यो उपसमूहको परिसूचक सबैभन्दा धेरै १.६८ प्रतिशतले वृद्धि
काठमाडौँ — सेयर कारोबार मापक नेप्से परिसूचक बुधबार फेरि २७ सय अंकभन्दा माथि उक्लेर बन्द भएको छ । मंगलबारको तुलनामा २२.०४ अंकले बढेपछि बुधबार नेप्से २ हजार ७ सय ५.९० अंकमा उक्लेको हो । गत आइतबार नेप्से २७ सय अंकमा बन्द भएको थियो । तर सोमबार र मंगलबार बजार घट्दा समग्र नेप्से २७ सयभन्दा तल ओर्लेको थियो । तर, बुधबार फेरि सोही विन्दुमा पुगेको छ ।
सो दिन कारोबारमा आएकामध्ये १ सय ९९ वटा कम्पनीको सेयर मूल्य बढ्दा ४९ वटाको मात्र घटेको छ । सेयर मूल्य बढ्ने कम्पनीमध्ये बैंकिङ उपसमूहका कम्पनी धेरै छन् । यो उपसमूहको परिसूचक सबैभन्दा धेरै १.६८ प्रतिशतले बढेको छ ।
बैंकिङसँगै जलविद्युत्, बिमा, उत्पादन तथा प्रशोधनलगायत ११ उपसमूहका परिसूचक बढे पनि समग्र नेप्सेमा दोहोरो अंकले बढ्न टेवा पुगेको हो । सो दिन वित्त कम्पनी र सामूहिक लगानी कोषका लगानीकर्ताले भने कमाउन सकेनन् । ती उपसमूहको परिसूचक ऋणात्मक बने ।
पछिल्ला दिनमा प्रायः कारोबार दिनमा नेप्सेमा सुधार देखिएको छ । यति बेला राष्ट्र बैंक आगामी आर्थिक वर्षको मौद्रिक नीतिको अन्तिम तयारीमा जुटेको छ । मौद्रिक नीतिमा सेयर बजार वृद्धिका लागि अनुकूल नीति आउने अनुमान गरिएका छन् । सुरुदेखि नै गभर्नर विश्वनाथ पौडेल सेयर बजारप्रति लचिलो देखिएका छन् ।
सोही कारण आउँदो मौद्रिक नीतिमार्फत सेयर बजारमा व्यक्तिगत सेयर कर्जाको सीमा, जोखिमभारलगायत नीति परिमार्जन गर्ने अनुमान लगानीकर्ताले गरेका छन् भने सोहीअनुसारको सुझाव राष्ट्र बैंकलाई दिएका छन् । यसकारण पछिल्ला दिनमा लगानीकर्ताको आत्मविश्वास बढेको ब्रोकरहरूको भनाइ छ । यद्यपि अपेक्षाअनुसार बजार बढ्न नसकेको उनीहरू बताउँछन् ।
बुधबार ६२ हजार ८ सय ८४ वटा कारोबारबाट १ करोड ५८ लाख २२ हजार ९ सय ७० कित्ता सेयर किनबेच भए । ती किनबेचमा ७ अर्ब ४५ करोड १८ लाख रुपैयाँ बराबरको सेयर किनबेच भएको छ । अघिल्लो दिनको तुलनामा कारोबार रकम बढेको हो । मंगलबार ६ अर्ब ५७ करोड ४१ लाख रुपैयाँ बराबरको सेयर कारोबार भएको थियो ।
सो दिन बरुण हाइड्रोपावरको मूल्य सबैभन्दा बढी ६.२१ प्रतिशतले बढेको छ । सो कम्पनीको प्रतिकित्ता मूल्य ४ सय ५२ रुपैयाँ पुगेको छ । यस्तै पञ्चकन्या माई हाइड्रोपावरको मूल्य ४.२८ प्रतिशतले बढेर प्रतिकित्ता मूल्य ४ सय ६ रुपैयाँ कायम भएको छ । तर ग्रिन डेभलपमेन्ट बैंकको सेयर मूल्य सबैभन्दा धेरै ४.४१ प्रतिशतले घटेर प्रतिकित्ता मूल्य एक हजार ३ सय ३१ रुपैयाँमा झरेको छ ।
एनएमबी हाइब्रिड फन्डको मूल्य ३.०१ प्रतिशतले घटेर प्रतिकित्ता मूल्य ८ रुपैयाँ कायम भएको छ । कारोबार रकमका आधारमा सो दिन राधी विद्युत्को सबैभन्दा अघि छ ।
बुधबार सो कम्पनीको कम्पनीको प्रतिकित्ता ७ सय ९० मा ४६ करोड ७१ लाख रुपैयाँको सेयर किनबेच भएको छ । कारोबार रकमका आधारमा दोस्रो स्थानमा बुटवल पावर कम्पनी छ । उक्त कम्पनीको प्रतिकित्ता ८ सय ३४ मा ३६ करोड ६७ लाख बराबरको सेयर कारोबार भएको नेप्सेले जनाएको छ ।
