काठमाडौँ — सर्वसाधारणले खरिद गर्ने सामानको मूल्य वृद्धिदर (मुद्रास्फीति) गत जेठमा औसत २.७२ प्रतिशत रहेको छ ।
गत वर्षको सोही महिनामा यस्तो वृद्धिदर ४.१७ प्रतिशत थियो । गत वैशाखको तुलनामा पनि जेठमा मूल्य वृद्धिदर घटेको हो ।
गत जेठमा खाद्य तथा पेय पदार्थ समूहको मूल्यवृद्धि ०.५४ र गैर–खाद्य तथा सेवाको ३.९४ प्रतिशतले मात्र बढेको छ । गत वर्षको जेठमा यी समूहहरूको ममूल्यवृद्धि क्रमशः ५.८५ प्रतिशत र ३.०७ प्रतिशत रहेको थियो ।
समीक्षा महिनामा खाद्य तथा पेय पदार्थ समूहअन्तर्गत घ्यु तथा तेल उपसमूहको मूल्यवृद्धि १०.०६, गैरमदिराजन्य पेय पदार्थको ५.१३, फलफूलको ३.५१ र दाल तथा गेडागुडीको २.८५ प्रतिशतले बढेको छ ।
तर, तरकारी उपसमूहको मूल्यवृद्धि ७.०४, मरमसलाको ३.०६ र माछा तथा मासुको २.९१ प्रतिशतले बढेको राष्ट्र बैंकको प्रतिवेदनले औंल्याएको छ ।
यस्तै, गैरखाद्य तथा सेवा समूहअन्तर्गत विविध वस्तु तथा सेवा उपसमूहको मूल्यवृद्धि ९.४३, कपडाजन्य तथा जुत्ताचप्पलको ६.८२, शिक्षाको ५.८८, फर्निसिङ तथा घरायसी उपकरणको ५.०६ र सुर्तीजन्य पदार्थको ४.६८ प्रतिशतले बढेको छ ।
